Ijtimoiy tarmoqlarda 41 yoshli B.A. go‘yoki Yunusobod tumani IIO FMB 3-sonli IIBga 2021-yilning 1-aprel kuni keltirilganidan so‘ng olgan tan jarohatlari tufayli vafot etganligi haqida xabar tarqalmoqda. Ushbu xabarlar yuzasidan Toshkent shahar Ichki ichlar bosh boshqarmasi izoh berdi.
Ma’lum qilinishicha, haqiqatan 1-aprel kuni soat 21:00 larda muqaddam to‘rt marotaba sudlangan B.A. va yana ikki nafar fuqaro – muqaddam sudlanganlar, 1979-yilda tug‘ilgan L.D. va 1970-yilda tug‘ilgan L.A. bilan so‘rov olib borishlik uchun Yunusobod tumani 3-sonli IIBga keltirilgan.
O‘rtacha hisobda 45 daqiqa davom etgan so‘rovdan so‘ng uchala shaxs qo‘yib yuborilgan, shu jumladan, B.A. ham. 2-aprel kuni ertalab soat 04:00–04:30 larda 30-uyning oldida B.A.ning murdasi topilgan.
O‘lim sababini aniqlash maqsadida sud-tibbiyot ekspertizasi tayinlangan. Respublika ilmiy-amaliy sud-tibbiyot markazi hududiy filiali tomonidan berilgan birlamchi ma’lumotga ko‘ra, marhumning bir nechta kasalliklari bo‘lgan, xususan, yurak ishemik kasalligi, gematogen sil, poliorgan yetishmovchiligi, ikki tomonlama o‘pka plevriti, bosh miya va o‘pka shishi, surunkali gepatit, giyohvandlik, alkogoldan zaharlanish.
Mazkur holat yuzasidan Yunusobod tumani prokuraturasi tomonidan tergovga qadar tekshiruv o‘tkazilmoqda.
Bundan avval Farg‘onada niqob taqmagan yigitning o‘ligi IIBdan chiqqani haqida mish-mish tarqalgandi. Aslida u akasini ko‘rgani ketayotganida vafot etgan bo‘lib chiqdi. Shuningdek, IIV Ohangaronda diniy ma’ruza eshitgan mahbus kaltaklanganini rad etgani haqida xabar berilgandi.
Izoh (0)