Nukus shahrida yigit va qizni pichoqlagan bola qamoqqa olindi, deya xabar qilmoqda Qoraqalpog‘iston prokuraturasi.
Ma’lum qilinishicha, 2021-yil 2-aprel kuni Qo‘ng‘irot tumanida yashovchi, 2000-yilda tug‘ilgan U.T. ismli yigit Nukus shahri 22-kichik tumanida joylashgan 36-sonli maktab yonida tanishi, Qoraqalpog‘iston davlat universiteti talabasi, 2001-yilda tug‘ilgan S.S. ismli qizga o‘zi bilan olib kelgan xo‘jalik pichog‘i bilan 3 marotaba urgan. Shuningdek, u o‘sha yerda bo‘lgan 2002-yilda tug‘ilgan T.A. ismli yigitga ham pichoq bilan bir necha marta jarohat yetkazib, voqea joyidan qochib ketgan.
Natijada fuqarolar S.S. va T.A. og‘ir ahvolda shifoxonaga yotqizilgan. Biroq ko‘rsatilgan tibbiy muolajalarga qaramasdan, S.S. 2021-yil 3-aprel kuni shifoxonada vafot etgan.
Mazkur hodisa bo‘yicha 2021-yil 2-aprel kuni Nukus shahri prokuraturasi tomonidan Jinoyat kodeksining 97-moddasi 2-qismi “a” bandi bilan jinoyat ishi qo‘zg‘atilib, U.T Jinoyat protsessual kodeksining 221-moddasi tartibida ushlangan.
Jinoyat ishlari bo‘yicha Nukus shahri sudining 3-aprel kunidagi qaroriga binoan ayblanuvchiga nisbatan qamoqqa olish ehtiyot chorasi qo‘llangan. Hozirda ushbu holat yuzasidan dastlabki tergov harakatlari olib borilmoqda.
Bundan avval Jizzaxda maktab o‘quvchisini zo‘rlagan shaxs jinoyati 20 yil o‘tib fosh bo‘lgani, Chiroqchida fuqaro qo‘shnisi bilan bilyardxonada tortishib qolib, uni pichoqlab o‘ldirgani hamda Samarqandda tanishini o‘ldirib, murdani hovlidagi xandaqqa ko‘mib qo‘ygan shaxs 18 yilga qamalgani haqida xabar berilgandi.
Izoh (0)