Нукус шаҳрида йигит ва қизни пичоқлаган бола қамоққа олинди, дея хабар қилмоқда Қорақалпоғистон прокуратураси.
Маълум қилинишича, 2021 йил 2 апрель куни Қўнғирот туманида яшовчи, 2000 йилда туғилган У.Т. исмли йигит Нукус шаҳри 22-кичик туманида жойлашган 36-сонли мактаб ёнида таниши, Қорақалпоғистон давлат университети талабаси, 2001 йилда туғилган С.С. исмли қизга ўзи билан олиб келган хўжалик пичоғи билан 3 маротаба урган. Шунингдек, у ўша ерда бўлган 2002 йилда туғилган Т.А. исмли йигитга ҳам пичоқ билан бир неча марта жароҳат етказиб, воқеа жойидан қочиб кетган.
Натижада фуқаролар С.С. ва Т.А. оғир аҳволда шифохонага ётқизилган. Бироқ кўрсатилган тиббий муолажаларга қарамасдан, С.С. 2021 йил 3 апрель куни шифохонада вафот этган.
Мазкур ҳодиса бўйича 2021 йил 2 апрель куни Нукус шаҳри прокуратураси томонидан Жиноят кодексининг 97-моддаси 2-қисми «а» банди билан жиноят иши қўзғатилиб, У.Т Жиноят процессуал кодексининг 221-моддаси тартибида ушланган.
Жиноят ишлари бўйича Нукус шаҳри судининг 3 апрель кунидаги қарорига биноан айбланувчига нисбатан қамоққа олиш эҳтиёт чораси қўлланган. Ҳозирда ушбу ҳолат юзасидан дастлабки тергов ҳаракатлари олиб борилмоқда.
Бундан аввал Жиззахда мактаб ўқувчисини зўрлаган шахс жинояти 20 йил ўтиб фош бўлгани, Чироқчида фуқаро қўшниси билан билярдхонада тортишиб қолиб, уни пичоқлаб ўлдиргани ҳамда Самарқандда танишини ўлдириб, мурдани ҳовлидаги хандаққа кўмиб қўйган шахс 18 йилга қамалгани ҳақида хабар берилганди.
Изоҳ (0)