Toshkent shahar transport boshqarmasi poytaxtda bike sharing tizimini rivojlantirish bo‘yicha dastlabki jiddiy loyihani taqdim etdi.
Bike sharing — bu qisqa muddatli yo‘l uchun bepul yoki arzon narxda ijaraga velosiped taqdim etiladigan tizim.
“Podrobno.uz”ning yozishicha, dastlab loyiha Yunusobod tumanidan boshlanadi va 4 punktni o‘z ichiga oladi. Uch oylik sinov natijalariga ko‘ra ushbu tajribani poytaxtning boshqa tumanlarida ham joriy etish rejalashtirilgan.
Yevropaning bir qator mamlakatlarida bike sharing jamoat transporti muqobili sifatida foydalaniladi.
Statistikaga ko‘ra, bugungi kunda Toshkentda 40 mingdan ortiq kishi velosipeddan foydalanadi.
Toshkentda umumiy hisobda 606 kilometr uzunlikdagi velosiped yo‘laklarini yaratish rejalashtirilmoqda. Hozirda 12,4 kilometr uzunlikdagi velosiped yo‘lakchalari aholi foydalanishi uchun topshirilgan.
Toshkentda velosipedlarni ijaraga berish tartibining dastlabki taklif loyihasi yuzasidan fikrlarni quyidagi havolada qoldirish mumkin.
Avvalroq Toshkent shahridagi Farg‘ona yo‘li ko‘chasini rekonstruksiya qilish doirasida eski tramvay liniyasi o‘rnida tezyurar avtobuslar (bus rapid transit) qatnovini joriy etish rejalashtirilgan, tajriba sifatida Istiqlol va Farg‘ona yo‘li ko‘chasi bo‘ylab Amir Temur xiyobonidan Compass savdo-ko‘ngilochar markaziga qadar yo‘nalish belgilangandi.
Shuningdek, poytaxtda tez yordam, o‘t o‘chirish mashinalari va avtobuslar uchun alohida yo‘laklar tashkil etilishi rejalashtirilgandi.
Izoh (0)