Andijon va Navoiy viloyati davlat soliq boshqarmalariga yangi rahbarlar tayinlandi
Prezident farmoyishiga binoan Andijon va Navoiy viloyatlari davlat soliq boshqarmalariga yangi boshliqlar tayinlandi. Bu haqda Davlat soliq qo‘mitasi matbuot xizmati xabar berdi.
Andijon viloyati davlat soliq boshqarmasi boshlig‘i etib Ravshanjon Nasimov tayinlandi. Tayinlovga qadar Navoiy viloyati Davlat soliq boshqarmasi boshlig‘i lavozimida ishlab kelgan.
Ravshanjon Nasimov 1971-yilda Samarqand viloyatida tug‘ilgan. 1993-yilda Toshkent moliya institutini “iqtisodchi” mutaxassisligi bo‘yicha tamomlagan.
Navoiy viloyati davlat soliq boshqarmasi boshlig‘i lavozimiga esa Anvarjon Botiraliyev tayinlangan. Tayinlovga qadar u Farg‘ona viloyati davlat soliq boshqarmasi boshlig‘i o‘rinbosari vazifasida ishlab kelgan.
Anvarjon Botiraliyev 2001-yilda Farg‘ona davlat universitetini “iqtisodiyot” mutaxassisligi, 2004 yilda Bank-moliya akademiyasini “Soliqlar va soliqqa tortish” mutaxassisligi bo‘yicha tamomlagan.
Ravshanjon Nasimov ham, Anvarjon Botiraliyev ham soliq xizmatining I darajali maslahatchisi hisoblanadi.
Avvalroq Kapital bozorini rivojlantirish agentligi direktori lavozimida ishlab kelayotgan Otabek Nazirov to‘g‘ridan to‘g‘ri investitsiyalar jamg‘armasi bosh direktori etib tayinlangani haqida xabar berilgan edi. Shuningdek, Monopoliyaga qarshi kurashish qo‘mitasiga yangi rais, O‘zbekiston transport vaziri va O‘zbekiston qurilish vaziriga yangi o‘rinbosar tayinlangani haqida xabar berilgan edi.
