Prezident Shavkat Mirziyoyev Namangandagi 26-mehribonlik uyiga tashrifi chog‘ida bag‘riga bosgan qizaloq oilasiga qaytgani to‘g‘risida xabar berilgandi. Prezident matbuot xizmati tomonidan e’lon qilingan “Xalq bilan” loyihasining navbatdagi sonida mehribonlik uyi tarbiyalanuvchilarining davlat rahbari bilan uchrashuv haqida so‘z bordi.
Ta’kidlanishicha, Prezident ko‘tarib suratga tushgan qizaloqning onasi ularni televizorda ko‘rgan va uni hamda mehribonlik uyida qoldirgan yana 3 nafar farzandini uyga olib ketgan. Mehribonlik uyi direktorining aytishicha, 60 nafar tarbiyalanuvchidan 47 nafari qolgan. Ketganlar to‘liq oilalarda yashayapti.
“Meni oldilariga turg‘izib qo‘ygandilar, o‘shanda meni ko‘tarib oldilar (Prezident — tahr.). Yaxshi qiz bo‘l, dedilar”, — deydi oilasi bag‘riga qaytgan Shirin ismli qizaloq.
Davlat rahbari uchrashuv davomida bu dunyoda kim baxtli va kim baxtsiz ekanligini Xudoning o‘zi hamda kelajak ko‘rsatishini ta’kidlagan.
“Faqat vaqtinchalikka hujjatlashtirib bergandik u yoqqa. Bir vaqtlar bolalarim bilan mana shu yerda birga o‘tirish, birga yotish, choy ichishni orzu qilardim”, — deydi Shirinning onasi.
“Boshqa oilalar ham bizning bolalarimizni olib ketishdi. Hatto ikki nafar boshqa millatga mansub bolalarimizni o‘zbek oilalari o‘zlariga farzand qilib olib ketdi”, — deydi mehribonlik uyi direktori.
Tarbiyalanuvchilardan biri Prezident bilan yana uchrashishni orzu qilishini, unga “juda ham yaxshi ko‘rishini aytishini xohlashini, o‘tgan safar aytmoqchi bo‘lgani, lekin uyalganini” ta’kidlagan.
“Faqat ishonch bilan o‘zlaringni ustilaringda ishlab, kerak bo‘lsa, do‘stlaringdan, qarindoshlaringdan, qo‘shnilaringdan aqlliroq, baxtliroq bo‘lishlaring uchun men hamma sharoitni yaratishga harakat qilyapman. Ilohim, yurtimiz tinch bo‘lsin, osoyishtalik bo‘lsin, yurtimizga ko‘z tegmasin”, — degan Prezident mehribonlik uyi tarbiyalanuvchilari bilan uchrashuvda.
Avvalroq chirchiqlik 7 yoshli Husanjonga Prezident dastxati tushirilgan birgalikdagi surati topshirilgani to‘g‘risida xabar berilgandi.
Izoh (0)