Vengriyaning OTP Bank’i O‘zbekistonning “Ipoteka bank”ini xususiylashtirishda ishtirok etadi. Bu haqda Prezident Shavkat Mirziyoyev 30-mart kuni bo‘lib o‘tgan o‘zbek—venger kengaytirilgan formatdagi muzokaralar vaqtida ma’lum qildi.
“Vengriyaning OTP Bank’i O‘zbekistonning ‘Ipoteka bank’ining davlat ulushini xususiylashtirishda ishtirok etishni boshlaganini qizg‘in qutlaymiz”, — dedi Shavkat Mirziyoyev.
Davlat rahbari ushbu masala yuzasidan tomonlar “jiddiy kelishib olganini” ta’kidlagan. Uning so‘zlariga ko‘ra, 30-kuni banklar rahbarlari bilan tor doiradagi uchrashuvda rejalar va istiqboldagi vazifalar muhokama qilingan. Prezident biroz muddat o‘tgach, real natijalar qayd etila boshlashini aytgan.
Vengriyaning OTP Bank’i O‘zbekiston bozoriga kirib kelishi 2020-yilning iyulidayoq ma’lum bo‘lgan edi. Bu haqda Vengriya tashqi ishlar va savdo vaziri Peter Siyartoning Toshkentga tashrifi chog‘ida so‘z ochilgandi. 2021-yilning fevralida OTP Bank O‘zbekistondagi banklardan birini xususiylashtirish jarayonida qatnashishi xabar qilingan edi.
2019-yilning iyun oyida “Ipoteka bank”ning ustav kapitalidagi davlat ulushi 2022-yilning yakuniga qadar 50 foizdan kamroq bo‘lishi kutilayotgani ta’kidlangandi. Bank Xalqaro moliya korporatsiyasi ishtirokida xususiylashtirilishi va transformatsiya qilinishi ko‘zda tutilgan.
OTP Group (“Gruppa OTP”, BSE: OTP, LSE: OTPD) — moliya, sug‘urta, investitsiya va bank biznesi bilan shug‘ullanuvchi bank guruhi — aktivlar va lizingni boshqarishdan tortib, pensiyalarni moliyalashtirishgacha bo‘lgan sohalarda faoliyat yuritadi.
Avvalroq O‘zbekiston bilan Vengriya o‘rtasida strategik sheriklik to‘g‘risidagi qo‘shma deklaratsiya va o‘ndan ortiq hujjat imzolangani to‘g‘risida xabar berilgandi.
Izoh (0)