Coca-cola Ichimligi Uzbekistan, Ltd MChJ ustav kapitalidagi davlat ulushini sotish jarayonining navbatdagi bosqichi yakunlandi. Bu haqda Davlat aktivlarini boshqarish agentligi xabar berdi.
Ma’lum qilinishicha, Davlat tender komissiyasining qaroriga muvofiq, davlat ulushini sotish jarayonining ikkinchi bosqichiga o‘tkazilgan talabgorlar bilan Davlat aktivlari agentligi hamda Coca-cola Ichimligi Uzbekistan o‘rtasida axborotni oshkor etmaslik to‘g‘risida bitimlar imzolangan.
Davlat ulushini sotish bo‘yicha moliyaviy maslahatchi – Rothschild & Cie investitsiya banki tomonidan talabgorlarga ikkinchi bosqich yuzasidan jarayon xati yuborilib, Coca-cola Ichimligi Uzbekistan’ning 2017, 2018 va 2019-yillardagi moliyaviy hisobotlari, biznes rejasi hamda faoliyatining moliyaviy, soliqqa oid, tashkiliy va huquqiy jihatlari batafsil bayon etilgan hisobotlar taqdim etilgan.
Ta’kidlanishicha, bugungi kunda, talabgorlardan Coca-cola Ichimligi Uzbekistan, Ltd’ni sotib olish bo‘yicha majburiy bo‘lmagan (indikativ) takliflar kelib tushgan.
Mazkur takliflar Rothschild & Cie investitsiya banki va Dentons yuridik firmasi bilan birgalikda o‘rganib chiqilib, Davlat tender komissiyasining qarori bilan navbatdagi bosqichga o‘tkazilgan.
“Ayni paytda, talabgorlar foydalanishi uchun Davlat aktivlari agentligi tomonidan KPMG xalqaro audit kompaniyasi va Dentons yuridik firmasi bilan birgalikda Coca-cola Ichimligi Uzbekistan’ning moliyaviy, huquqiy, tashkiliy va boshqa axborotlarini o‘z ichiga olgan virtual ma’lumotlar bazasi yaratildi”, — deyiladi xabarda.
Jarayonning mazkur bosqichida talabgorlarga virtual ma’lumotlar bazasidan foydalangan holda kompaniyaga oid qo‘shimcha o‘rganishlarni o‘tkazish, uning taqdimotida ishtirok etish, Coca-cola Ichimligi Uzbekistan, Ltd MChJ rahbariyati bilan muloqot hamda savol-javoblar sessiyasi uchun imkoniyat beriladi.
Mavzuga doir: Coca-Cola Uzbekistan’ning davlat ulushiga talabgorlar aniqlandi. Ular orasida Afrika kompaniyalari ham bor
Ushbu kompaniya davlat ulushining sotilishi bo‘yicha ko‘rsatgan shartlar orasida sotib oluvchi kamida 7 yillik tajribaga ega bo‘lishi, yillik sof tushumi 200 million dollardan kam bo‘lmasligi, alkogolsiz ichimliklar bo‘yicha xalqaro tajribaga ega bo‘lishi kabilar keltirilgan. Bunday talablar “g‘olib xaridor oldindan aniq”, degan shubhalar paydo qilgan.
Dekabr oyida bosh vazir o‘rinbosari Jamshid Qo‘chqorov Coca-Cola’ning davlat ulushini sotib olish uchun 3 ta taklif tushganini, 70 million dollar berishga tayyor kompaniya bilan muzokara boshlanishini ma’lum qilgandi. Yanvar oyi boshlarida Turkiyaning Coca-Cola İçecek kompaniyasi Coca-Cola’dagi davlat ulushini xarid qilish uchun ariza bergani ma’lum bo‘ldi.
Izoh (0)