2020-yilda korrupsiya holatlari bo‘yicha 2270 kishiga nisbatan jinoiy ish ochilgan. Bu haqda senat raisi Tanzila Norboyeva 29-mart kuni bo‘lib o‘tgan Korrupsiyaga qarshi kurashish milliy kengashining yig‘ilishida ma’lum qildi, deb xabar beradi “Gazeta.uz”.
“Korrupsiya — hokimiyat va boshqaruv asoslarini yemiradigan, uning aholi oldidagi obro‘siga putur yetkazadigan, fuqarolarning qonuniy huquq va manfaatlariga daxl qiladigan xavfli hodisa”, — deya ta’kidlagan senat raisi.
Tanzila Norboyevaning so‘zlariga ko‘ra, Transparency International xalqaro nohukumat tashkilotining 2020-yil uchun e’lon qilingan korrupsiyani qabul qilish indeksida O‘zbekiston o‘rni 7 pog‘onaga yaxshilanib, 180 davlat orasida 146-o‘rinni egallagan bo‘lsa-da, davlat rahbarining 2020-yil 2-iyundagi tegishli farmonida tasdiqlangan samaradorlik ko‘rsatkichiga (KPI) hali erishilmagan.
“Farmonda 25 balldan 27 ballga ko‘tarilish vazifasi qo‘yilgan. Lekin bor-yo‘g‘i 1 ballga (26 ball) ko‘tarilish qayd etilgan, xolos”, — deydi senat raisi. U amalga oshirilayotgan ishlarga qaramasdan korrupsiyaga qarshi kurashishda katta o‘zgarishga erishilmagani, bunday jinoyatlar hali kamaymaganini qayd etgan.
Ma’lumotga ko‘ra, 2020-yilda sudlar tomonidan korrupsiya holatlari bo‘yicha 2270 shaxsga nisbatan jinoyat ishlari ko‘rib chiqilgan. Ulardan:
- 1056 nafar shaxsga nisbatan pora berish (211-modda);
- 825 nafar shaxsga nisbatan mansab soxtakorligi (209-modda);
- 184 nafar shaxsga nisbatan hokimiyat yoki mansab vakolatini suiiste’mol qilish (205-modda);
- 133 nafar shaxsga nisbatan pora olish (210-modda) moddalari bo‘yicha jinoyat ishlari ko‘rib chiqilgan.
Ushbu jinoyatlarning 89,4 foizi quyi bo‘g‘in (tuman, shahar yoki ularga tenglashtirilgan), 9,2 foizi o‘rta bo‘g‘in (viloyat yoki ularga tenglashtirilgan), 1,4 foizi yuqori bo‘g‘in (respublika yoki unga tenglashtirilgan) xodimlari yoki mansabdor shaxslari tomonidan sodir etilgan.
Korrupsiyaga qarshi kurashish agentligi va “Ijtimoiy fikr” markaziga ushbu masala bo‘yicha aholi fikrini o‘rgangan holda Milliy kengashga taqdim etish vazifasi topshirilgan. Shuningdek, yig‘ilishda qonun hujjatlarini korrupsiyaga qarshi ekspertizadan o‘tkazish va ularni bartaraf etish bo‘yicha ishlarni tizimli davom ettirish lozimligi aytilgan.
Ta’kidlanishicha, Adliya vazirligi tomonidan qurilish, sog‘liqni saqlash, oliy ta’lim va davlat xaridlari sohasidagi qonun hujjatlari ekspertizadan o‘tkazilganda, 226 ta qonun hujjatining 65 tasida (29 foizi) 292 ta korrupsiyaviy omillar mavjudligi aniqlangan. Bular, asosan:
- “normativ huquqiy hujjatlar o‘rtasida ziddiyatlarning mavjudligi” (81 ta);
- “diskretsion vakolatlarning kengligi” (53 ta);
- “ma’muriy tartib-taomillarning mavjud emasligi yoki to‘liq emasligi” (25 ta) bilan bog‘liq korrupsiyaviy omillardir.
Tanzila Norboyevaning qayd etishicha, bu kabi omillar korrupsiyaga oid huquqbuzarliklarning sodir etilishiga ham sabab bo‘lmoqda. “Masalan, 2019-yilda 59 ta bu kabi huquqbuzarlik sodir etilgan bo‘lsa, 2020-yilda ushbu ko‘rsatkich 162 taga ortgan. Qolaversa, Hisob palatasi tomonidan 82 ta qurilish obyektida budjet mablag‘larining maqsadli sarflanishi bo‘yicha o‘tkazilgan tekshirishlarda 66 milliard so‘mlik moliyaviy xato va kamchiliklar aniqlangan”, — deydi senat raisi.
Eslatib o‘tamiz, adliya vaziri ishtirokida 15-fevral kuni o‘tkazilgan matbuot anjumanida Ruslanbek Davletov korrupsiya masalasi 2020-yilda ham eng ko‘p muhokama qilingan masalalardan biri bo‘lgani, jamiyatda korrupsiyaga nisbatan toqatsizlik oshib, nafrat o‘sganini aytgandi.
Izoh (0)