Президент Шавкат Мирзиёев Намангандаги 26-меҳрибонлик уйига ташрифи чоғида бағрига босган қизалоқ оиласига қайтгани тўғрисида хабар берилганди. Президент матбуот хизмати томонидан эълон қилинган «Халқ билан» лойиҳасининг навбатдаги сонида меҳрибонлик уйи тарбияланувчиларининг давлат раҳбари билан учрашув ҳақида сўз борди.
Таъкидланишича, Президент кўтариб суратга тушган қизалоқнинг онаси уларни телевизорда кўрган ва уни ҳамда меҳрибонлик уйида қолдирган яна 3 нафар фарзандини уйга олиб кетган. Меҳрибонлик уйи директорининг айтишича, 60 нафар тарбияланувчидан 47 нафари қолган. Кетганлар тўлиқ оилаларда яшаяпти.
«Мени олдиларига турғизиб қўйгандилар, ўшанда мени кўтариб олдилар (Президент — таҳр.). Яхши қиз бўл, дедилар», — дейди оиласи бағрига қайтган Ширин исмли қизалоқ.
Давлат раҳбари учрашув давомида бу дунёда ким бахтли ва ким бахтсиз эканлигини Худонинг ўзи ҳамда келажак кўрсатишини таъкидлаган.
«Фақат вақтинчаликка ҳужжатлаштириб бергандик у ёққа. Бир вақтлар болаларим билан мана шу ерда бирга ўтириш, бирга ётиш, чой ичишни орзу қилардим», — дейди Шириннинг онаси.
«Бошқа оилалар ҳам бизнинг болаларимизни олиб кетишди. Ҳатто икки нафар бошқа миллатга мансуб болаларимизни ўзбек оилалари ўзларига фарзанд қилиб олиб кетди», — дейди меҳрибонлик уйи директори.
Тарбияланувчилардан бири Президент билан яна учрашишни орзу қилишини, унга «жуда ҳам яхши кўришини айтишини хоҳлашини, ўтган сафар айтмоқчи бўлгани, лекин уялганини» таъкидлаган.
«Фақат ишонч билан ўзларингни устиларингда ишлаб, керак бўлса, дўстларингдан, қариндошларингдан, қўшниларингдан ақллироқ, бахтлироқ бўлишларинг учун мен ҳамма шароитни яратишга ҳаракат қиляпман. Илоҳим, юртимиз тинч бўлсин, осойишталик бўлсин, юртимизга кўз тегмасин», — деган Президент меҳрибонлик уйи тарбияланувчилари билан учрашувда.
Аввалроқ чирчиқлик 7 ёшли Ҳусанжонга Президент дастхати туширилган биргаликдаги сурати топширилгани тўғрисида хабар берилганди.
Изоҳ (0)