Chirchiqlik 7 yoshli Husanjonga Prezident dastxati tushirilgan birgalikdagi surati topshirildi

Prezident Shavkat Mirziyoyev 18—19-mart kunlari Toshkent viloyatiga qilgan tashrifi chog‘ida Chirchiq shahridagi “Iftixor” mahallasida yashovchi Aziza Aliqulovaning 7 yoshli o‘g‘li Husanjon Adhamov va qizi Fotima Adhamova bilan suhbatlashib, birgalikda esdalik uchun suratga tushgan edi. O‘zAning yozishicha, Navro‘z bayrami munosabati bilan Toshkent viloyati hokimi Davron Hidoyatov ushbu oila xonadonida mehmon bo‘lgan.

Viloyat hokimi Prezident nomidan oilaga mebel, Husanjonga esa Prezident Shavkat Mirziyoyev dastxati tushirilgan birgalikdagi fotoportretini taqdim etgan. Shuningdek, bolalarga kompyuter jamlanmasi va sport anjomlari ham sovg‘a qilingan.

“Bundan tashqari, ‘Iftixor’ mahallasida yashovchi yoshlarga ham qimmatbaho sovg‘alar taqdim etildi”, — deyiladi xabarda.

Eslatib o‘tamiz, 18-mart kuni Shavkat Mirziyoyev Toshkent viloyatining Chirchiq shahridagi qurilish ishlari bilan tanishgan, “Iftixor” mahallasi aholisi bilan suhbatlashgan, suhbat davomida Chirchiq shahrida “elektrichka” yo‘lga qo‘yilishini ma’lum qilgan edi.

Shuningdek, davlat rahbari shahardagi xonadonlarning birida yashovchi Anife Bektoshova oilasida ham bo‘lgan, oilaning oyog‘ini lat yedirib olgan farzandi bilan suhbatlashib, uni davolatish bo‘yicha topshiriq ham bergandi.