Qozog‘istonda koronavirusning yangi mutatsiyasi paydo bo‘lgan bo‘lishi mumkin. Uni hozircha shartli ravishda “olmaotacha” shtamm deb nomlashdi. Bu haqda Qozog‘iston Agrar universiteti qoshidagi Xalqaro vaksinologiya markazi mutaxassislariga tayanib Tengrinews xabar berdi.
Xabarga ko‘ra, mamlakatda koronavirusning “britancha” va “janubiy afrikacha” shtammlarining mavjudligini aniqlash maqsadida mutaxassislar 18-martdan 25-martgacha tadqiqot o‘tkazgan.
“Natijada mutaxassislar ‘britancha’ shtammning bugungi kunda yaxshi o‘rganilgan turiga 100 foiz mos kelishini aniqladi. Lekin ‘janubiy afrikacha’ shtammi mutatsiyaga uchrab bo‘lgan. Davomi juda qiziq. Mutatsiya Qozog‘istonda bir yildan ortiq vaqt davomida kasallanishga sabab bo‘lgan Uxanning asl shtammida aniqlandi. Bu mutagenni vaqtinchalik shartli ravishda ‘olmaotacha’ shtamm deb nomlashdi”, — deb ma’lumot berdi “Xabar 24” telekanali.
“Biz hozircha mazkur shtammning nimaga javob berishini bilamiz, lekin buning aynan qay darajada qat’iy shakllangan mutatsiya ekanini ayta olish uchun boshqa ajralib turuvchi xususiyatlari tadqiq qilinmadi. Uning tasodifiy emas, balki qat’iy shakllangan mutatsiya ekanini bilish uchun qo‘shimcha tadqiqotlar o‘tkazish kerak”, — dedi mikrobiolog Vitaliy Strochkov.
Uning so‘zlariga ko‘ra, bu yo‘nalishda tadqiqotlarni davom ettirish kerak. Tibbiyot qanday muammoga duch kelganini to‘liq anglab olish uchun Qozog‘istonning eng kamida 10 ta hududidan namunalarni o‘rganish lozim.
“Hozircha bu viruslar Qozog‘iston aholisi orasida qanchalik darajada tarqalgani bizga noma’lum. Bizdagi namunalar faqat Olmaotadan olindi. Lekin bu haqda ma’lumotga ega bo‘lish uchun batafsil tadqiqot o‘tkazish talab etiladi. Masalan, G‘arbda, Buyuk Britaniyani misol qilib olsak, COVID-19’ni ijobiy tasdiqlovchi har o‘ninchi namunaning aminokislota yoki nukleotidlar ketma-ketligi aniqlanadi. Lekin afsuski, bizning mamlakatimizda bu qamrov juda kam”, — dedi Xalqaro vaksinologiya markazi rahbari Kaysar Tabinov.
Avvalroq Qozog‘istonning Olmaota shahrida 21-martdan buyon amal qilib kelayotgan karantin cheklovlari uzaytirildi. Shahar bosh sanitar shifokori Jandarbek Bekshin tegishli qarorni imzoladi.
Shuningdek, Jandarbek Bekshin 26-mart kuni Olmaotada koronavirusning yanada yuqumliroq deb hisoblanuvchi “britancha” va “janubiy afrikacha” shtammlariga xos bo‘lgan mutatsiyalar aniqlanganini ma’lum qildi. “Yangi shtammlarning yuqumlilik darajasi avvalgi odatiy shtammga qaraganda 70 foizga yuqori… Aynan shu narsa so‘nggi vaqtlarda shaharda kuzatilayotgan kasallik yuqishining o‘sishiga turtki bermoqda”, — dedi u.
28-mart holatiga ko‘ra, bir kecha-kunduzda Qozog‘istonda 1492 kishida koronavirus aniqlangan. Olmaotada bir kun avvalgiga nisbatan (510 kishi) kamroq kasallanish holatlari (415 kishi) aniqlangan. Nur-Sultonda esa 346 kishida kasallik aniqlangan. Mamlakatda pandemiya boshidan buyon koronavirusni yuqtirganlar soni 241 873 kishiga yetgan.
Qozog‘istonda 1-fevraldan aholini koronavirusga qarshi emlash boshlandi. Mamlakat aholisi “Sputnik V” vaksinasi bilan emlanmoqda. Hozirda Rossiyaning vaksinasi Qozog‘istondagi Qarag‘anda farmatsevtika majmuasi tomonidan ishlab chiqarilmoqda.
Izoh (0)