Қозоғистонда коронавируснинг янги мутацияси пайдо бўлган бўлиши мумкин. Уни ҳозирча шартли равишда «олмаотача» штамм деб номлашди. Бу ҳақда Қозоғистон Аграр университети қошидаги Халқаро вакцинология маркази мутахассисларига таяниб Tengrinews хабар берди.
Хабарга кўра, мамлакатда коронавируснинг «британча» ва «жанубий африкача» штаммларининг мавжудлигини аниқлаш мақсадида мутахассислар 18 мартдан 25 мартгача тадқиқот ўтказган.
«Натижада мутахассислар ‘британча’ штаммнинг бугунги кунда яхши ўрганилган турига 100 фоиз мос келишини аниқлади. Лекин ‘жанубий африкача’ штамми мутацияга учраб бўлган. Давоми жуда қизиқ. Мутация Қозоғистонда бир йилдан ортиқ вақт давомида касалланишга сабаб бўлган Уханнинг асл штаммида аниқланди. Бу мутагенни вақтинчалик шартли равишда ‘олмаотача’ штамм деб номлашди», — деб маълумот берди «Хабар 24» телеканали.
«Биз ҳозирча мазкур штаммнинг нимага жавоб беришини биламиз, лекин бунинг айнан қай даражада қатъий шаклланган мутация эканини айта олиш учун бошқа ажралиб турувчи хусусиятлари тадқиқ қилинмади. Унинг тасодифий эмас, балки қатъий шаклланган мутация эканини билиш учун қўшимча тадқиқотлар ўтказиш керак», — деди микробиолог Виталий Строчков.
Унинг сўзларига кўра, бу йўналишда тадқиқотларни давом эттириш керак. Тиббиёт қандай муаммога дуч келганини тўлиқ англаб олиш учун Қозоғистоннинг энг камида 10 та ҳудудидан намуналарни ўрганиш лозим.
«Ҳозирча бу вируслар Қозоғистон аҳолиси орасида қанчалик даражада тарқалгани бизга номаълум. Биздаги намуналар фақат Олмаотадан олинди. Лекин бу ҳақда маълумотга эга бўлиш учун батафсил тадқиқот ўтказиш талаб этилади. Масалан, Ғарбда, Буюк Британияни мисол қилиб олсак, COVID-19’ни ижобий тасдиқловчи ҳар ўнинчи намунанинг аминокислота ёки нуклеотидлар кетма-кетлиги аниқланади. Лекин афсуски, бизнинг мамлакатимизда бу қамров жуда кам», — деди Халқаро вакцинология маркази раҳбари Кайсар Табинов.
Аввалроқ Қозоғистоннинг Олмаота шаҳрида 21 мартдан буён амал қилиб келаётган карантин чекловлари узайтирилди. Шаҳар бош санитар шифокори Жандарбек Бекшин тегишли қарорни имзолади.
Шунингдек, Жандарбек Бекшин 26 март куни Олмаотада коронавируснинг янада юқумлироқ деб ҳисобланувчи «британча» ва «жанубий африкача» штаммларига хос бўлган мутациялар аниқланганини маълум қилди. «Янги штаммларнинг юқумлилик даражаси аввалги одатий штаммга қараганда 70 фоизга юқори… Айнан шу нарса сўнгги вақтларда шаҳарда кузатилаётган касаллик юқишининг ўсишига туртки бермоқда», — деди у.
28 март ҳолатига кўра, бир кеча-кундузда Қозоғистонда 1492 кишида коронавирус аниқланган. Олмаотада бир кун аввалгига нисбатан (510 киши) камроқ касалланиш ҳолатлари (415 киши) аниқланган. Нур-Султонда эса 346 кишида касаллик аниқланган. Мамлакатда пандемия бошидан буён коронавирусни юқтирганлар сони 241 873 кишига етган.
Қозоғистонда 1 февралдан аҳолини коронавирусга қарши эмлаш бошланди. Мамлакат аҳолиси «Спутник V» вакцинаси билан эмланмоқда. Ҳозирда Россиянинг вакцинаси Қозоғистондаги Қарағанда фармацевтика мажмуаси томонидан ишлаб чиқарилмоқда.
Изоҳ (0)