O‘zbekistonda yoshlarning kasblar va mutaxassisliklarni egallashga bo‘lgan qiziqishlarini qo‘llab-quvvatlash uchun keng imkoniyatlar yaratish maqsadida 2021/2022-o‘quv yilidan professional ta’lim tizimida dual ta’lim tashkil etiladi. Bu haqda 29-mart kuni Vazirlar Mahkamasining tegishli qarori qabul qilindi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimligi, manfaatdor vazirliklar va idoralarga iqtisodiyot tarmoqlarida tegishli kasblar va mutaxassisliklar bo‘yicha o‘rta bo‘g‘in kadrlariga bo‘lgan ehtiyojni muntazam o‘rganib, dual ta’lim tizimini tashkil etish hamda bitiruvchilar bandligini ta’minlash yuzasidan tegishli chora-tadbirlarni belgilash hamda dual ta’lim tashkil etiladigan tashkilotlar bo‘yicha Oliy va o‘rta maxsus ta’lim vazirligiga takliflar kiritib borish vazifalari topshirildi.
Hujjatga muvofiq, o‘quvchilar professional ta’lim muassasalaridagi o‘quv jarayonlarida haftada kamida ikki kun ishtirok etadi. Qolgan ish kunlarida tegishli tashkilotlarda amaliy mashg‘ulotlar bilan birga mehnat faoliyati olib boradi.
Buning uchun javobgarlik Oliy va o‘rta maxsus ta’lim vazirligi, shuningdek, tizimida professional ta’lim muassasalari bo‘lgan idoralarga topshirildi.
Eslatib o‘tamiz, 2021/2022-o‘quv yilidan boshlab amaliyotga yo‘naltirilgan ta’lim dasturlarini joriy etish maqsadida OTMlarda ham dual ta’lim tizimi joriy etiladi. Dual ta’lim tizimi asosida ishlab chiqarish amaliyotini o‘tayotgan o‘quvchilarga ish beruvchi bilan tuzilgan muddatli mehnat shartnomasiga muvofiq ish haqi to‘lanishi mumkin.
Izoh (0)