Qoraqalpog‘iston Respublikasi Qonliko‘l tumanida bir guruh fuqarolar “Bizga Bekbergenovaday rahbar kerak emas, sud qaroridan norozimiz” degan so‘zlar yozilgan plakatni ko‘tarib, yo‘lning qatnov qismini yopib qo‘ygani aks etgan video “Daryo”ga kelib tushdi.
Voqea guvohlarining ma’lum qilishicha, e’tirozchilar tomonidan tilga olingan Elmira Bekbergenova Qonliko‘l tumanidagi 1-sonli maktabgacha ta’lim tashkiloti rahbari lavozimida faoliyat yuritib keladi.
Holat yuzasidan Maktabgacha ta’lim vazirligi axborot xizmati rahbari Mavluda Asqarxo‘jayeva “Daryo”ga izoh berdi.
“Qoraqalpog‘iston Respublikasi Maktabgacha ta’lim vazirligi tomonidan o‘rganishlar davomida maktabgacha ta’lim tashkiloti rahbari Elmira Bekbergenova faoliyatida noqonuniy ishlar kelib chiqqani uchun lavozimiga noloyiq deb topilgan. Ammo sud qarori bilan maktabgacha ta’lim mudirasi o‘z lavozimiga qayta tiklangan. Shunga maktabgacha ta’lim tashkiloti tarbiyachilari e’tiroz bildirgan. Ushbu masala yuzasidan ichki audit xizmati ish olib bormoqda, ishchi guruh tuzilib, holat qaytadan o‘rganib chiqiladi. Lekin shuni unutmaslik lozimki, sud mustaqil organ hisoblanadi. Shu bois biz sud ishlariga aralashishga haqimiz yo‘q va qarorni ijro etishga majburmiz”, — dedi Mavluda Asqarxo‘jayeva.
Uning qo‘shimcha qilishicha, tekshiruvlarda faoliyatida noqonuniy harakatlar bor deb topilgan mudiralarning sud tomonidan yana ishga qayta tiklash holatlari ko‘plab uchramoqda.
“Maktabgacha ta’lim tashkilotlarida ichki audit tekshiruvlari o‘tkazilgan vaqtda ko‘plab mudiralar faoliyatida korrupsion holatlar va boshqa noqonuniy harakatlar kuzatilmoqda. O‘z navbatida, biz o‘rganishlar bo‘yicha prokuratura organlariga ma’lumot taqdim etamiz. Prokuratura o‘rnatilgan tartibda ishni ko‘rib chiqib, hujjatlarni sud organlariga taqdim etadi. Sudda esa aksar hollarda qo‘shtirnoq ichidagi mudiralar yutib chiqqani kuzatilmoqda”, — dedi Maktabgacha ta’lim vazirligi axborot xizmati rahbari.
Izoh (0)