Ўзбекистонда ёшларнинг касблар ва мутахассисликларни эгаллашга бўлган қизиқишларини қўллаб-қувватлаш учун кенг имкониятлар яратиш мақсадида 2021/2022 ўқув йилидан профессионал таълим тизимида дуал таълим ташкил этилади. Бу ҳақда 29 март куни Вазирлар Маҳкамасининг тегишли қарори қабул қилинди.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлиги, манфаатдор вазирликлар ва идораларга иқтисодиёт тармоқларида тегишли касблар ва мутахассисликлар бўйича ўрта бўғин кадрларига бўлган эҳтиёжни мунтазам ўрганиб, дуал таълим тизимини ташкил этиш ҳамда битирувчилар бандлигини таъминлаш юзасидан тегишли чора-тадбирларни белгилаш ҳамда дуал таълим ташкил этиладиган ташкилотлар бўйича Олий ва ўрта махсус таълим вазирлигига таклифлар киритиб бориш вазифалари топширилди.
Ҳужжатга мувофиқ, ўқувчилар профессионал таълим муассасаларидаги ўқув жараёнларида ҳафтада камида икки кун иштирок этади. Қолган иш кунларида тегишли ташкилотларда амалий машғулотлар билан бирга меҳнат фаолияти олиб боради.
Бунинг учун жавобгарлик Олий ва ўрта махсус таълим вазирлиги, шунингдек, тизимида профессионал таълим муассасалари бўлган идораларга топширилди.
Эслатиб ўтамиз, 2021/2022 ўқув йилидан бошлаб амалиётга йўналтирилган таълим дастурларини жорий этиш мақсадида ОТМларда ҳам дуал таълим тизими жорий этилади. Дуал таълим тизими асосида ишлаб чиқариш амалиётини ўтаётган ўқувчиларга иш берувчи билан тузилган муддатли меҳнат шартномасига мувофиқ иш ҳақи тўланиши мумкин.
Изоҳ (0)