Afrikaning sobiq eng boy ayoli, sobiq ittifoqda tug‘ilgan angolalik tadbirkor Izabel dush Santush mamlakat prezidenti Joao Lourensuni o‘zining biznesini yo‘q qilish maqsadida unga qarshi “shaxsiy adovat”da aybladi. Bu haqda London sudiga kiritilgan arizaga tayanib Financial Times xabar berdi, deb yozmoqda “RBK”.
Izabel dush Santush — Angolaning amaldagi prezidenti Joao Lourensudan oldingi davlat rahbari Joze Eduardu dush Santushning to‘ng‘ich qizi. U otasining boshqaruvi davrida mobil telefon ishlab chiqaruvchi Unitel firmasining 25 foiz ulush egasiga, shuningdek, bir nechta banklarning sherikchilik asosidagi egasi va Sonangol davlat neft kompaniyasining raisiga aylandi.
Dush Santushning deyarli 40 yillik boshqaruvidan keyin hukumatga Angoladagi urug‘chilik kapitalizmini tugatishga va’da bergan Lourensu keldi va sobiq prezidentning qizi o‘z aktivlarini yo‘qota boshladi, shuningdek, turli yurisdiksiyalarda uning ustidan sud tekshiruvlari boshlandi.
O‘tgan hafta Unitel kompaniyasining dush Santush tomonidan berilgan qarzlarni so‘ndirishni talab qilgan Unitel kompaniyasi bilan sud tortishuvlari doirasida London sudiga ariza kiritildi. Nashr tanishib chiqqan arizada dush Santushning ta’kidlashicha, prezident Lourensu Angola prokurorlari, sudyalari va tergovchilariga tadbirkorga qarshi siyosiy kampaniya boshlashni buyurgan. U o‘z boyligining qonuniy yo‘l bilan ishlab topilganini aytmoqda, Lourensu atrofidagi vakillar tomonidan tayyorlangan yozuvlar esa prezidentning “siyosiy maqsadlari va shaxsiy adovati” borligini ko‘rsatmoqda.
Arizaga ko‘ra, bu yozuvlar Mossad maxsus xizmatining sobiq ofitseri tashkil etgan Isroilning Black Cube xususiy razvedka guruhi tomonidan tayyorlangan. Ularda Angolaning siyosiy va ishbilarmon elitasi a’zolari, shu jumladan, Sonangol neft kompaniyasining direktorlar kengashi raisi Karlos Saturnino, sobiq vitse-prezident va Sonangol rahbari, hozirda Lourensuga maslahatchilik qilayotgan Manuel Visente singari nufuzli siyosiy arboblar qarindoshlarining ovozlaridan iborat. Bu odamlar hukumat kampaniyasining “Angola davlati va institutsional hokimiyat resurslaridan foydalanish orqali”, shuningdek, “oldindan belgilangan sud jarayoni” bilan dush Santushni ta’qib qilayotgani haqida xabar berdi, deyiladi arizada.
Joze Eduardu dush Santush Angolani deyarli 40 yil boshqardi. 2017-yilda Lourensu uning qizini Sonangol direktorlar kengashi raisligidan bo‘shatganidan so‘ng uning biznesi muammolarga duch kela boshladi. 2020-yil yanvar oyida Angola hukumati Izabel dush Santushni talon-toroj va “pul yuvish”da aybladi va uning aktivlarini muzlatib qo‘ydi. U barcha ayblovlarni rad etdi va Yevropa inson huquqlari sudiga aktivlarining muzlatilishi bo‘yicha da’vo kiritdi.
Izabel dush Santush Afrikaning eng boy ayoli edi. 2021-yilning yanvar oyida aktivlari muzlatilganidan so‘ng Forbes uni milliarderlar ro‘yxatidan chiqardi.
Izoh (0)