Африканинг собиқ энг бой аёли Ангола президентини судга берди

Африканинг собиқ энг бой аёли, собиқ иттифоқда туғилган анголалик тадбиркор Изабель душ Сантуш мамлакат президенти Жоао Лоуренсуни ўзининг бизнесини йўқ қилиш мақсадида унга қарши «шахсий адоват»да айблади. Бу ҳақда Лондон судига киритилган аризага таяниб Financial Times хабар берди, деб ёзмоқда «РБК».

Изабель душ Сантуш — Анголанинг амалдаги президенти Жоао Лоуренсудан олдинги давлат раҳбари Жозе Эдуарду душ Сантушнинг тўнғич қизи. У отасининг бошқаруви даврида мобил телефон ишлаб чиқарувчи Unitel фирмасининг 25 фоиз улуш эгасига, шунингдек, бир нечта банкларнинг шерикчилик асосидаги эгаси ва Sonangol давлат нефть компаниясининг раисига айланди.

Душ Сантушнинг деярли 40 йиллик бошқарувидан кейин ҳукуматга Анголадаги уруғчилик капитализмини тугатишга ваъда берган Лоуренсу келди ва собиқ президентнинг қизи ўз активларини йўқота бошлади, шунингдек, турли юрисдиксияларда унинг устидан суд текширувлари бошланди.

Ўтган ҳафта Unitel компаниясининг душ Сантуш томонидан берилган қарзларни сўндиришни талаб қилган Unitel компанияси билан суд тортишувлари доирасида Лондон судига ариза киритилди. Нашр танишиб чиққан аризада душ Сантушнинг таъкидлашича, президент Лоуренсу Ангола прокурорлари, судьялари ва терговчиларига тадбиркорга қарши сиёсий кампания бошлашни буюрган. У ўз бойлигининг қонуний йўл билан ишлаб топилганини айтмоқда, Лоуренсу атрофидаги вакиллар томонидан тайёрланган ёзувлар эса президентнинг «сиёсий мақсадлари ва шахсий адовати» борлигини кўрсатмоқда.

Аризага кўра, бу ёзувлар Моссад махсус хизматининг собиқ офицери ташкил этган Исроилнинг Black Cube хусусий разведка гуруҳи томонидан тайёрланган. Уларда Анголанинг сиёсий ва ишбилармон элитаси аъзолари, шу жумладан, Sonangol нефть компаниясининг директорлар кенгаши раиси Карлос Сатурнино, собиқ вице-президент ва Sonangol раҳбари, ҳозирда Лоуренсуга маслаҳатчилик қилаётган Мануэль Висенте сингари нуфузли сиёсий арбоблар қариндошларининг овозларидан иборат. Бу одамлар ҳукумат кампаниясининг «Ангола давлати ва институционал ҳокимият ресурсларидан фойдаланиш орқали», шунингдек, «олдиндан белгиланган суд жараёни» билан душ Сантушни таъқиб қилаётгани ҳақида хабар берди, дейилади аризада.

Жозе Эдуарду душ Сантуш Анголани деярли 40 йил бошқарди. 2017 йилда Лоуренсу унинг қизини Sonangol директорлар кенгаши раислигидан бўшатганидан сўнг унинг бизнеси муаммоларга дуч кела бошлади. 2020 йил январь ойида Ангола ҳукумати Изабель душ Сантушни талон-торож ва «пул ювиш»да айблади ва унинг активларини музлатиб қўйди. У барча айбловларни рад этди ва Европа инсон ҳуқуқлари судига активларининг музлатилиши бўйича даъво киритди.

Изабель душ Сантуш Африканинг энг бой аёли эди. 2021 йилнинг январь ойида активлари музлатилганидан сўнг Forbes уни миллиардерлар рўйхатидан чиқарди.