Словакия бош вазири Игор Матович «Оддий халқ» партиясидаги сафдоши, молия вазири Эдуард Хегерга лавозим алмашишни таклиф қилди. Бунга сабаб қилиб Матович мамлакатда Россиянинг «Спутник V» вакцинасидан фойдаланишга рухсат берганидан кейин ҳукуматда пайдо бўлган зиддиятларини ҳал қилиш кўрсатилмоқда, деб ёзади «РБК».
Хабарга кўра, 28 март куни ўтказилган матбуот анжуманида Матович истеъфога чиқиш учун ҳукмрон Словакия коалициясининг бошқа аъзолари талаб қилган барча вариантларни рад этиб, Молия вазирлиги раҳбари билан «ўрин алмашиш»ни таклиф қилди. Ушбу режага мувофиқ, Хегер ҳукуматни бошқаради, Матович эса молия вазири ўрнини эгаллайди.
Бош вазир, шунингдек, бундан кейин бош вазир ўринбосари Рихард Сулик, адлия вазири Мария Коликова ва парламент спикери ўринбосари Юрай Шелигнинг истеъфосини талаб қилмаслигини айтди.
Хегер ҳукуматни бошқаришга тайёрлигини маълум қилган. У Суликнинг «Озодлик ва бирдамлик» партиясидан ёрдам сўрашга, сўнг Словакия президенти Зузана Чапутова билан учрашиб, кейинги ҳаракатлар тўғрисида келишиб олишга ваъда берган. Коалициянинг «Халқ учун» партияси етакчиси Вероника Ремишова аллақачон Хегерга ишонч билдирган ва Матовичнинг таклифи ҳукмрон коалицияга янги имконият берганини айтган.
Эслатиб ўтамиз, Словакия Европа Иттифоқида «Спутник V»ни Европа дори-дармон агентлиги (EMA) маъқуллашидан олдин тасдиқлаган Венгриядан кейинги иккинчи мамлакатга айланганди. «Спутник V»га буюртма бериш Словакиянинг ҳукмрон коалициясида тортишувларга сабаб бўлди. Коалициядаги тўртта партиядан иккитаси EMA’нинг рухсатини кутишни талаб қилди. Улар Словакия соғлиқни сақлаш вазири Марек Крайчи ва бош вазир Матовичнинг истеъфосини талаб қилиб, уларга коалициядан чиқиб кетиш билан таҳдид қилди. Крайчи ҳукуматдаги можаролар сабабли истеъфога чиқди. Муҳокамалардан сўнг коалиция аъзолари фақат Крайчининг истеъфоси етарли бўлишига эътироз билдирди.
Ремишова мавжуд вазиятдан чиқишнинг икки йўлини кўраётганини айтди: муддатидан олдин парламент сайловларини ўтказиш ёки Матович ва Суликнинг зудлик билан истеъфога чиқиши. Суликнинг ўзи эса фақат бош вазир ўз лавозимидан кетган тақдирда, «Эркинлик ва бирдамлик» партияси ҳукумат таркибида қолишини айтди.
21 март куни Матович парламентнинг Соғлиқни сақлаш қўмитаси раҳбари Яна Битто-Зиганикова, шунингдек, Коликова ва Шелига ҳам ўз лавозимларини тарк этсагина, истеъфога чиқишга тайёрлигини эълон қилди. Шу билан бирга, Матович коалициядаги сафдошларининг Россия вакцинаси импортидан «коалиция инқирозини келтириб чиқариш» мақсадида фойдаланганини таъкидлади.
Аввалроқ Словакия бош вазири Матович коронавирусга қарши «Спутник V» вакцинаси эвазига Россияга Украинанинг Закарпате вилоятини бермоқчилигини айтиб, ҳазил қилганди. Украина ташқи ишлар вазирлиги Матовичдан айтган сўзлари учун расмий равишда кечирим сўрашни талаб қилди. Матович «ноўрин гапи» учун «барча украиналиклардан» кечирим сўраган.
Изоҳ (0)