Ichki ishlar vazirligi 28-mart kuni Toshkent markazida sodir bo‘lgan tartibsizlik bo‘yicha o‘zining rasmiy pozitsiyasi ifodalangan videolavhani e’lon qildi.
Eslatib o‘tamiz, Amir Temur xiyoboni oldida fuqarolarni LGBT faollari deb hisoblab, ularga qarshi chiqish qilgan 12 kishi qo‘lga olingan edi. Holat yuzasidan “bezorilik” moddasi bo‘yicha jinoyat ishi ochilgan.
“Oxirgi kunlarda Miraziz Bozorov ismli fuqaro o‘zining ijtimoiy tarmoqlardagi sahifalarida Toshkent shahridagi Xastimom masjidi oldida va Amir Temur xiyobonida noan’anaviy jinsiy qarashga ega shaxslar tomonidan ommaviy namoyishlar o‘tkazish bo‘yicha chaqiriqlar bilan chiqqan.
Bozorov bundan avval ham bir necha bor jamiyatda yurish-turish qoidalarini qasddan mensimasdan, shaxsning qadr-qimmatini kamsituvchi, millatimizga xos bo‘lmagan xurmacha qiliqlari aks etgan videolavhalarini ijtimoiy tarmoqlar orqali tarqatib kelgan”, — deyiladi munosabatda.
“Buning oqibatida, mazkur shaxslar tomonidan ommaviy tartibsizlik sodir etilib, jamoat xavfsizligiga putur yetkazilgan. O‘z navbatida huquq-tartibot organlari tomonidan mazkur tartibsizlik keskin bartaraf etilib, huquqbuzarlik sodir etgan shaxslar qo‘lga olingan”, — deya ta’kidlanadi xabarda.
Videolavhada bir necha kishi tasvirlangan bo‘lib, ularning yuzlari berkitilgan. Ushbu fuqarolarning so‘zlaridan tushunish mumkinki, ular ruxsatsiz aksiya ishtirokchisi bo‘lgan:
“Bu bolaning gaplariga e’tibor bermanglar, bunaqa fitnalarga uchish, aldanish kerak emas ekan. Mana, biz aldandik, ko‘rdik kimligini. Aql bilan ish qilish kerak ekan”;
“U ma’lumot ishonchli emas ekan, shuni tushundim. Avvalambor, yaxshilab tekshirib, keyin harakat qilinsa, insonning o‘ziga foydasi bor ekan”;
“Ichki ishlar organlari xodimlari ham aytishyapti, tushuntirishdi, shunga qarab xulosa qilamiz”;
“Bu yerda hamma narsani tushuntirishdi, ko‘p narsalarni, birinchi o‘rinda qonunni bilmas ekanmiz. Ozgina yoshlik, ozgina tezlik qilib qo‘ydik”;
“Bu tartibsiz voqeaning oldi olinganidan, xalq tinch o‘tirganidan xursandmiz. Ichki ishlar organlari xodimlari tinchlantirish uchun o‘z ishlari, o‘z vazifalarini bajarishdi. Har qanday holatda qonuniy harakat qilish to‘g‘ri, degan xulosaga keldim”;
“Bolalarga aytamanki, agar ular yana ‘nimadir qilamiz’ yoki ‘mana bu yerda yig‘ilyapmiz, kelinglar, gaplashamiz’ kabi fitna gap qilsa, shoshqaloqlik qilish kerak emas ekan. Iloji bo‘lsa, egalariga — tegishli organlarga topshirish kerak. Organ xodimlari maslahat beradi”;
“Agar mana shunaqa yig‘ilish qilmoqchi bo‘lganlar bo‘lsa, birinchidan, menga o‘xshab qonuniy tarafini o‘rganmasdan bormanglar. Besoqolbozlikka qonuniy javobgarlik bor ekan. Shunaqa chaqiruvlar tarqaladigan bo‘lsa, umuman bormanglar. O‘zim boshimdan o‘tkazdim, ular faqat xabar tarqatadi, o‘zlari kelmaydi”;
“Qilgan xatti-harakatlarimiz noto‘g‘ri ekan, bunaqa besoqolbozlarga davlat tomonidan chora-tadbirlar bor. Ijtimoiy tarmoqlarda xabarlar kelsa, ularning fitnasiga uchib o‘tirmanglar”.
“Ta’kidlash lozimki, Bozorov ilgari ham o‘ziga nisbatan ijtimoiy tarmoqlarda bildirilgan e’tirozlarga javoban o‘zini jabrdiyda qilib ko‘rsatib, O‘zbekistonda noan’anaviy qarashlarga ega shaxslarga nisbatan go‘yoki bosim o‘tkazilayotganligiga xorijiy davlatlarning vakillari va xalqaro tashkilotlarning e’tiborini qaratishga urinib kelgan. Buzg‘unchi tashqi kuchlar va g‘arazli niyatdagi turli xalqaro, nohukumat tashkilotlar ko‘magi va qo‘llovi ostida harakat qilayotgan ushbu shaxs besoqolbozlik va shu kabi salbiy illatlarning O‘zbekiston qonunchiligida taqiqlangan bo‘lishiga qaramasdan, uni ommaviy targ‘ib qilishga harakat qilgan va fuqarolarda norozilik, toqatsizlik kayfiyati shakllanishiga sharoit yaratgan”, — deyiladi IIV munosabatida.
Shundan so‘ng videolavhada yana noma’lum fuqarolarning — ruxsat etilmagan miting qatnashchilari yoki ularning qarindoshlarining so‘zlari keltirilgan:
“Ukam kimlarningdir gapiga uchib, kerak bo‘lmagan ishlarni qilgan. Shuning uchun ota-onalarni ogohlikka chaqiraman. Yoshlar, yo‘q narsalarning ketidan yurmanglar, turli ma’lumotlarga ishonmanglar, ogoh bo‘lishlaringni so‘rayman”;
“Qattiqroq bo‘lish kerak. Biz qattiq bo‘lganimiz bilan ota-onalar hozir bolasiga qattiq qaramayapti. Ahmoqlik qilgan hammasi, ahmoqlik qilgani uchun shunaqa holatga tushyapti”;
“Har bitta xabarning tagiga yetib, batafsil o‘rganib, keyin qaror qabul qilishlaringni so‘rayman. Bu juda ham afsuslanarli, yomon natijalarga olib kelishi mumkin ekan. Hozir bilib-bilmay qon to‘kilishi, tashqaridan kelayotgan har xil xunrezliklarning boshi biz bo‘lib qolishimiz mumkin”.
Ta’kidlanishicha, hozirda tartibsizlik yuzasidan tergov harakatlari olib borilmoqda.
Mavzuga doir: O‘zbekistonda bir jinsli munosabatlarning qonuniylashtirilishiga qarshi bo‘lgan faollar Toshkent markazida norozilik bildirdi
Izoh (0)