Ички ишлар вазирлиги 28 март куни Тошкент марказида содир бўлган тартибсизлик бўйича ўзининг расмий позицияси ифодаланган видеолавҳани эълон қилди.
Эслатиб ўтамиз, Амир Темур хиёбони олдида фуқароларни ЛГБТ фаоллари деб ҳисоблаб, уларга қарши чиқиш қилган 12 киши қўлга олинган эди. Ҳолат юзасидан «безорилик» моддаси бўйича жиноят иши очилган.
«Охирги кунларда Миразиз Бозоров исмли фуқаро ўзининг ижтимоий тармоқлардаги саҳифаларида Тошкент шаҳридаги Хастимом масжиди олдида ва Амир Темур хиёбонида ноанъанавий жинсий қарашга эга шахслар томонидан оммавий намойишлар ўтказиш бўйича чақириқлар билан чиққан.
Бозоров бундан аввал ҳам бир неча бор жамиятда юриш-туриш қоидаларини қасддан менсимасдан, шахснинг қадр-қимматини камситувчи, миллатимизга хос бўлмаган хурмача қилиқлари акс этган видеолавҳаларини ижтимоий тармоқлар орқали тарқатиб келган», — дейилади муносабатда.
«Бунинг оқибатида, мазкур шахслар томонидан оммавий тартибсизлик содир этилиб, жамоат хавфсизлигига путур етказилган. Ўз навбатида ҳуқуқ-тартибот органлари томонидан мазкур тартибсизлик кескин бартараф этилиб, ҳуқуқбузарлик содир этган шахслар қўлга олинган», — дея таъкидланади хабарда.
Видеолавҳада бир неча киши тасвирланган бўлиб, уларнинг юзлари беркитилган. Ушбу фуқароларнинг сўзларидан тушуниш мумкинки, улар рухсатсиз акция иштирокчиси бўлган:
«Бу боланинг гапларига эътибор берманглар, бунақа фитналарга учиш, алданиш керак эмас экан. Мана, биз алдандик, кўрдик кимлигини. Ақл билан иш қилиш керак экан»;
«У маълумот ишончли эмас экан, шуни тушундим. Авваламбор, яхшилаб текшириб, кейин ҳаракат қилинса, инсоннинг ўзига фойдаси бор экан»;
«Ички ишлар органлари ходимлари ҳам айтишяпти, тушунтиришди, шунга қараб хулоса қиламиз»;
«Бу ерда ҳамма нарсани тушунтиришди, кўп нарсаларни, биринчи ўринда қонунни билмас эканмиз. Озгина ёшлик, озгина тезлик қилиб қўйдик»;
«Бу тартибсиз воқеанинг олди олинганидан, халқ тинч ўтирганидан хурсандмиз. Ички ишлар органлари ходимлари тинчлантириш учун ўз ишлари, ўз вазифаларини бажаришди. Ҳар қандай ҳолатда қонуний ҳаракат қилиш тўғри, деган хулосага келдим»;
«Болаларга айтаманки, агар улар яна ‘нимадир қиламиз’ ёки ‘мана бу ерда йиғиляпмиз, келинглар, гаплашамиз’ каби фитна гап қилса, шошқалоқлик қилиш керак эмас экан. Иложи бўлса, эгаларига — тегишли органларга топшириш керак. Орган ходимлари маслаҳат беради»;
«Агар мана шунақа йиғилиш қилмоқчи бўлганлар бўлса, биринчидан, менга ўхшаб қонуний тарафини ўрганмасдан борманглар. Бесоқолбозликка қонуний жавобгарлик бор экан. Шунақа чақирувлар тарқаладиган бўлса, умуман борманглар. Ўзим бошимдан ўтказдим, улар фақат хабар тарқатади, ўзлари келмайди»;
«Қилган хатти-ҳаракатларимиз нотўғри экан, бунақа бесоқолбозларга давлат томонидан чора-тадбирлар бор. Ижтимоий тармоқларда хабарлар келса, уларнинг фитнасига учиб ўтирманглар».
«Таъкидлаш лозимки, Бозоров илгари ҳам ўзига нисбатан ижтимоий тармоқларда билдирилган эътирозларга жавобан ўзини жабрдийда қилиб кўрсатиб, Ўзбекистонда ноанъанавий қарашларга эга шахсларга нисбатан гўёки босим ўтказилаётганлигига хорижий давлатларнинг вакиллари ва халқаро ташкилотларнинг эътиборини қаратишга уриниб келган. Бузғунчи ташқи кучлар ва ғаразли ниятдаги турли халқаро, ноҳукумат ташкилотлар кўмаги ва қўллови остида ҳаракат қилаётган ушбу шахс бесоқолбозлик ва шу каби салбий иллатларнинг Ўзбекистон қонунчилигида тақиқланган бўлишига қарамасдан, уни оммавий тарғиб қилишга ҳаракат қилган ва фуқароларда норозилик, тоқатсизлик кайфияти шаклланишига шароит яратган», — дейилади ИИВ муносабатида.
Шундан сўнг видеолавҳада яна номаълум фуқароларнинг — рухсат этилмаган митинг қатнашчилари ёки уларнинг қариндошларининг сўзлари келтирилган:
«Укам кимларнингдир гапига учиб, керак бўлмаган ишларни қилган. Шунинг учун ота-оналарни огоҳликка чақираман. Ёшлар, йўқ нарсаларнинг кетидан юрманглар, турли маълумотларга ишонманглар, огоҳ бўлишларингни сўрайман»;
«Қаттиқроқ бўлиш керак. Биз қаттиқ бўлганимиз билан ота-оналар ҳозир боласига қаттиқ қарамаяпти. Аҳмоқлик қилган ҳаммаси, аҳмоқлик қилгани учун шунақа ҳолатга тушяпти»;
«Ҳар битта хабарнинг тагига етиб, батафсил ўрганиб, кейин қарор қабул қилишларингни сўрайман. Бу жуда ҳам афсусланарли, ёмон натижаларга олиб келиши мумкин экан. Ҳозир билиб-билмай қон тўкилиши, ташқаридан келаётган ҳар хил хунрезликларнинг боши биз бўлиб қолишимиз мумкин».
Таъкидланишича, ҳозирда тартибсизлик юзасидан тергов ҳаракатлари олиб борилмоқда.
Мавзуга доир: Ўзбекистонда бир жинсли муносабатларнинг қонунийлаштирилишига қарши бўлган фаоллар Тошкент марказида норозилик билдирди
Изоҳ (0)