LGBT huquqlarini himoya qilgan bloger Miraziz Bozorov o‘z uyi oldida do‘pposlab ketildi

LGBT huquqlarini himoya qilgani bilan tanilgan bloger Miraziz Bozorovni 28-mart, yakshanba kuni soat taxminan 22:45 Mirobod tumani Afrosiyob ko‘chasi 21-uy oldida uch nafar noma’lum shaxs urib, tan jarohati yetkazgan va voqea joyidan noma’lum tarafga yashiringan, deya xabar bermoqda Toshkent shahar IIBB matbuot xizmati.

Miraziz Bozorov olgan tan jarohatlari bilan shifoxonaga yotqizilgan. Tibbiyot muassasasidan olingan ma’lumotga ko‘ra, Bozorovda bosh miya ochiq va yopiq jarohatlari, o‘ng qosh sohasi yirtilgan jarohati, ko‘krak qafasi va qorin sohasi yumshoq to‘qimalari lat yeyishi, o‘ng oyoq boldir suyagi ochiq sinishi jarohatlari qayd etilgan.

Toshkent shahar IIBBdan ma’lum qilishlaricha, mazkur holat yuzasidan Mirobod tumani IIO FMB Tergov bo‘limi tomonidan Jinoyat kodeksining 105-moddasi 2-qismi “i” bandi (qasddan badanga o‘rtacha og‘ir shikast yetkazish) alomatlari bilan jinoyat ishi qo‘zg‘atilgan.

“Hozirda Miraziz Bozorovga nisbatan tan jarohatlari yetkazgan noma’lum shaxslarni aniqlash maqsadida tergov-tezkor guruhi tuzilib, tergov harakatlari olib borilmoqda”, — deyiladi Toshkent shahar IIBB axborotida.

Ma’lumot uchun, bloger Miraziz Bozorov 11-mart kuni TikTok’dagi sahifasida LGBT huquqlarini himoya qiluvchilarni har juma kuni Toshkentdagi Xast Imom maydonida yig‘ilishga chorlagan edi. “Hamma — LGBT safida bo‘lganlar kelmasin, u yerda sizni urishlari, o‘ldirib qo‘yishlari mumkin — LGBTning bazaviy huquqlarini qo‘llab-quvvatlovchi hamma ertaga va har juma Xastimomga kelishlari kerak”, — degandi Miraziz Bozorov. Uning bu chorlovidan so‘ng Xastimomda LGBT huquqlari faollarining biror uchrashuvi yo yig‘ilishi o‘tkazilganmi yoki yo‘q — noma’lum.

Eslatib o‘tamiz, 28-mart, yakshanba kuni soat 15:00—15:15 oralig‘ida Toshkentdagi Amir Temur xiyoboni oldida O‘zbekistonda bir jinsli munosabatlarning qonuniylashtirilishiga qarshi bo‘lgan faollar norozilik bildirib yig‘ilgani haqida xabar berilgan edi. Toshkent shahar IIBB ma’lumotlariga ko‘ra, yig‘ilganlar orasida boshqa ikki kishini LGBT faollari deb gumonlab, ularni urmoqchi bo‘lgan shaxslar ham bo‘lgan. Ularga yana 20—25 kishi qo‘shilib, “bezorilik harakatlari”ni sodir etgan. Oxir-oqibat huquq-tartibot organlari tomonidan 12 kishi ushlangan, ularga nisbatan Jinoyat kodeksining 277-moddasi 2-qismi (bezorilik) alomatlari bilan jinoyat ishi qo‘zg‘atilgan.