“Avto 60 oy” ishi bo‘yicha sud hukmi o‘qildi

“Avto 60 oy” MChJ mas’ullariga nisbatan jinoyat ishini ko‘rib chiqish bo‘yicha ochiq sud jarayoni nihoyasiga yetdi va 29-mart kuni sud hukmi e’lon qilindi.

Ushbu jinoyat ishi jinoyat ishlari bo‘yicha Chilonzor tuman sudi sudyasi D. Valiyev tomonidan ko‘rib chiqilgan. E’lon qilingan sud hukmiga ko‘ra:

1. J. Bahodirov (“Avto 60 oy” MChJ rahbari)ga uzil-kesil o‘tash uchun 8 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
2. O. Mirzayevga uzil-kesil o‘tash uchun 7 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
3. E. Qurbonov (“Avto 60 oy” MChJ bosh hisobchisi)ga uzil-kesil o‘tash uchun 6 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
4. M. Gulmirzayevaga 5 yil muddatga ozodlikni cheklash jazosi tayinlandi. M. Gulmirzayevaga Jinoyat kodeksining 62-moddasi (ushlab turish, qamoqqa olish yoki uy qamog‘i vaqtini hisobga olish qoidalari) tartibida, 2019-yil 7-noyabrdan 20-noyabrga qadar dastlabki qamoqda saqlangan 14 kun muddatini ozodlikdan cheklashning bir kuniga tenglashtirib hisobga olgan holda o‘tash uchun uzil-kesil 4 yil 11 oy 16 kun muddatga ozodlikni cheklash jazosi qoldirildi.
5. M. Hakimova (“Avto 60 oy” MChJ maslahatchisi) jazodan ozod qilindi.

Eslatib o‘tamiz, “Avto 60 oy” MChJning mansabdor shaxslari va boshqalarga nisbatan 2019-yil 12-oktabr kuni Jinoyat kodeksining 188-1-moddasi 1-qismi (pul mablag‘larini va (yoki) boshqa mol-mulkni jalb etishga doir noqonuniy faoliyat) bilan jinoyat ishi qo‘zg‘atilgan edi.

Tergov jarayonida J. Bahodirov o‘zining jinoiy sheriklari bilan oldindan til biriktirib, bir guruh bo‘lib, “Avto oltmish oy” va Catalea Media MChJ va YaTT “J.Baxodirov”ni tashkil etib, 3 oy muddat ichida O‘zbekistonda UzAuto Motors AJ tomonidan ishlab chiqarilgan avtomashinalarni yetkazib berishni va’da qilib,  avtomashina rusumiga qarab, 1 million so‘mdan 10 million so‘mgacha bo‘lgan miqdorda pul olib, mablag‘larni qo‘lga kiritgani aniqlangan.

Jinoyat ishi bo‘yicha “Avto 60 oy” MChJ bosh ofisidan olingan buxgalteriya hujjatlaridagi ma’lumotlar bo‘yicha 19 344 dan ortiq shaxslar bilan shartnomalar tuzganligi aniqlangan va ushbu shartnomalar jinoyat ishiga qo‘shilgan. Tergov harakatlari davomida jami yetkazilgan moddiy zarar 47,7 milliard so‘m ekani aniqlanib, shundan 36,8 milliard so‘m undirilgan.