Qashqadaryo viloyatining Qarshi shahrida AQShning O‘zbekistondagi elchixonasi va Xalqaro ta’lim bo‘yicha Amerika kengashlari tashabbusi doirasida Xalq ta’limi vazirligi bilan hamkorlikda tashkil etilgan Amerika burchagi ochildi. Bu haqda tadbirda ishtirok etgan “Daryo” muxbiri xabar berdi.
Ma’lum bo‘lishicha, viloyat “Barkamol avlod” bolalar maktabida joylashgan yangi kutubxona kompyuter laboratoriyasi, anjumanlar zali hamda AQShda bakalavriat va magistratura yo‘nalishlari bo‘yicha ta’lim olmoqchi bo‘lgan yoshlarga bepul maslahat ko‘rsatuvchi EducationUSA markazi sinfxonasidan iborat.
Kutubxona ochilishida ishtirok etgan AQShning O‘zbekistondagi elchisi Deniel Rozenblyumning ta’kidlashicha, mazkur Amerika burchagi Markaziy Osiyoda faoliyat yuritayotgan shu kabi maskanlardan eng kattasi hisoblanadi.
“Qarshi shahrida tashkil etilgan Amerika burchagi dunyoning 140 dan ortiq mamlakatlarida ochilgan 600 dan ziyod shu kabi markazlardan biri bo‘ldi. Endilikda maskanda tanlov asosida saralab olingan mahalliy mutaxassislar bilan bir qatorda Fulbrayt dasturi bo‘yicha O‘zbekistonga kelib, bevosita Qashqadaryoda faoliyat yuritayotgan amerikalik o‘qituvchilar ham ta’lim beradi”, — dedi AQShning O‘zbekistondagi elchisi Deniel Rozenblyum.
Qashqadaryo viloyat xalq ta‘limi boshqarmasi boshlig‘i To‘lqin Karimovning vazirlik axborotiga tayanib ta‘kidlashicha, O‘zbekistonda Amerika burchaklari yettitaga yetishi ko‘zda tutilgan bo‘lib, mazkur ishga 800 ming dollar sarflanishi rejalashtirilgan.
2021-yil yakuniga qadar bunday maskanlardan yana biri Samarqand shahrida o‘z faoliyatini boshlashi mumkin.
Izoh (0)