Toshkentda bemor tez tibbiy yordam shifokori boshiga qattiq jism bilan urib, unga og‘ir tan jarohati yetkazdi, deya xabar qilmoqda Sog‘liqni saqlash vazirligi matbuot xizmati.
Qayd etilishicha, 2021-yilning 26-mart kuni soat 23:43 da Toshkentdagi 103 dispetcherlik xizmatiga Mirobod tumanida istiqomat qiluvchi 19 yoshli fuqaro A.dan chaqiriq kelib tushadi.
Ko‘rsatilgan manzilga tez tibbiy yordam brigadasi (shifokor – 1995-yilda tug‘ilgan B.H.) 7 daqiqa ichida zudlik bilan yetib boradi. Bemor ko‘rikdan o‘tkazilayotgan vaqtda to‘satdan shifokor B.H.ga sababsiz tashlanib, uning boshiga qattiq jism bilan urib, og‘ir tan jarohati yetkazadi.
Shifokorning olgan jarohatidan kuchli qon ketayotgani sabab voqea joyidan tez tibbiy yordam avtomashinasida Tibbiyot xodimlarining kasbiy malakasini rivojlantirish markazining ko‘p tarmoqli klinikasiga olib borilgan. Keyinchalik esa bemorning ahvoli yaxshi emasligi va jarohati o‘ta og‘irligini inobatga olinib, Respublika shoshilinch tibbiy yordam ilmiy markaziga o‘tkazilgan.
“26 yoshli tez tibbiy yordam shifokori B.H. ayni paytda markazimizning neyroreanimatsiya bo‘limida og‘ir ahvolda intensiv davo muolajalarini olmoqda. U hozir og‘ir ahvolda, bemorga bosh miya yopiq jarohati, bosh miyaning o‘rta darajadagi lat yeyishi, bosh tepa va ensa sohalaridagi yirtilgan jarohat tashxisi qo‘yilgan”, — deydi Respublika shoshilinch tibbiy yordam ilmiy markazi bosh direktori Davron To‘laganov.
Dastavval Tibbiyot xodimlarining kasbiy malakasini rivojlantirish markazining ko‘p tarmoqli klinikasiga olib borilgan B.H.ning boshidan kuchli qon ketayotgani sabab qon to‘xtatish uchun boshning tepa va ensa sohalaridagi jarohatga 4 ta chok qo‘yilgan.
Vazirlik bu uchun huquqni muhofaza qilish organlaridan aybdorlarga nisbatan tegishli jazo choralarini qo‘llashni talab etib, uni nazorat qilishini ta’kidlab o‘tgan.
Ma’lum qilinishicha, Toshkent shahri tez tibbiy yordam brigadalari tomonidan 2021-yilning yanvar oyida 82 ming 462 ta, fevral oyida 80 ming 290 ta va 1-martdan to 27-martgacha 80 ming 531 ta chaqiriqlarga o‘z vaqtida zudlik bilan tibbiy yordam ko‘rsatilgan. 2020-yil ushbu tizimga mamlakat bo‘yicha 11 yarim milliondan oshiq murojaatlar kelib tushgan.
Bundan avval Toshkentda mast erkak shifokor ayolni kaltaklab, jiddiy jarohat yetkazgani, Jizzaxda chaqiruv bo‘yicha yetib kelgan shifokor xonadon egasining o‘g‘li tomonidan kaltaklangani hamda Samarqandda shifoxona qorovuli va shifokorini urgan shaxsga nisbatan jinoyat ishi qo‘zg‘atilgani haqida xabar berilgandi.
Izoh (0)