Қашқадарё вилоятининг Қарши шаҳрида АҚШнинг Ўзбекистондаги элчихонаси ва Халқаро таълим бўйича Америка кенгашлари ташаббуси доирасида Халқ таълими вазирлиги билан ҳамкорликда ташкил этилган Америка бурчаги очилди. Бу ҳақда тадбирда иштирок этган «Дарё» мухбири хабар берди.
Маълум бўлишича, вилоят «Баркамол авлод» болалар мактабида жойлашган янги кутубхона компьютер лабораторияси, анжуманлар зали ҳамда АҚШда бакалавриат ва магистратура йўналишлари бўйича таълим олмоқчи бўлган ёшларга бепул маслаҳат кўрсатувчи EducationUSA маркази синфхонасидан иборат.
Кутубхона очилишида иштирок этган АҚШнинг Ўзбекистондаги элчиси Дэниэл Розенблюмнинг таъкидлашича, мазкур Америка бурчаги Марказий Осиёда фаолият юритаётган шу каби масканлардан энг каттаси ҳисобланади.
«Қарши шаҳрида ташкил этилган Америка бурчаги дунёнинг 140 дан ортиқ мамлакатларида очилган 600 дан зиёд шу каби марказлардан бири бўлди. Эндиликда масканда танлов асосида саралаб олинган маҳаллий мутахассислар билан бир қаторда Fulbrayt дастури бўйича Ўзбекистонга келиб, бевосита Қашқадарёда фаолият юритаётган америкалик ўқитувчилар ҳам таълим беради», — деди АҚШнинг Ўзбекистондаги элчиси Дэниэл Розенблюм.
Қашқадарё вилоят халқ таълими бошқармаси бошлиғи Тўлқин Каримовнинг вазирлик ахборотига таяниб таъкидлашича, Ўзбекистонда Америка бурчаклари еттитага етиши кўзда тутилган бўлиб, мазкур ишга 800 минг доллар сарфланиши режалаштирилган.
2021 йил якунига қадар бундай масканлардан яна бири Самарқанд шаҳрида ўз фаолиятини бошлаши мумкин.
Изоҳ (0)