1-apreldan Rossiya va O‘zbekiston o‘rtasida muntazam aviaqatnovlar qayta yo‘lga qo‘yilayotgani haqida xabar berilgandi. Dastlab Moskva—Toshkent yo‘nalishida bitta muntazam reys bo‘ladi. Mamlakatga kirish istagida bo‘lgan fuqarolar O‘zbekistonda yashash guvohnomasiga va Rossiyaga kirish uchun biror asosga ega bo‘lishi talab etiladi. Bu haqda Rossiyaning O‘zbekistondagi elchixonasining konsullik bo‘limi ma’lum qildi.
Mazkur reysdan Rossiyaga kirish bo‘yicha mamlakat hukumatining 2020-yil 16-martdagi farmoyishida nazarda tutilgan cheklovni hisobga olmaganda, O‘zbekistonda yashash guvohnomasiga ega bo‘lgan o‘zbekistonlik va xorijliklar foydalanishi mumkin.
Aviatashuvchilar va reyslar amalga oshiriladigan sanalar haqida ikki mamlakat o‘rtasida kelishuvga erishilganidan keyin ma’lum qilinadi.
“Toshkent—Moskva yo‘nalishida amalga oshiriladigan qolgan reyslar charter bo‘lib qoladi. Yuqorida aytib o‘tilgan farmoyishga ko‘ra, Rossiyaga kirish uchun chipta xarid qilishda asos bo‘lishi shart”, – deyiladi xabarda.
Eslatib o‘tamiz, karantin cheklovlari tufayli O‘zbekiston va Rossiya o‘rtasidagi aviaqatnovlar 2020-yilning 16-martida to‘xtatilgandi. Sentabr oyida O‘zbekiston sog‘liqni saqlash vazirining birinchi o‘rinbosari, Sanitariya-epidemiologik osoyishtalik agentligi direktori Bahodir Yusupaliyev O‘zbekistonda Rossiya bilan aviaqatnovlar sentabr oyida tiklanishi mumkinligini aytgandi. Ammo O‘zbekiston bosh vaziri o‘rinbosari, Respublika maxsus komissiyasi a’zosi Aziz Abduhakimov Rossiya O‘zbekistonning muntazam aviaqatnovlarni tiklash bo‘yicha taklifini rad etganini ma’lum qildi.
Izoh (0)