“O‘zgidromet” dam olish kunlari qanday ob-havo kuzatilishini ma’lum qildi

26-mart kuni Kavkaz hududlaridan iliq va nam havo massalari kirib kelishi sababli O‘zbekistonning aksariyat hududlarida yomg‘ir yog‘adi. Ba’zi joylarda momaqaldiroq bo‘lishi va shamol 15-20 metr/sekundgacha kuchayishi mumkin, deb yozmoqda “O‘zgidromet”.

Qoraqalpog‘istonda, Xorazm, Buxoro, Navoiy, Surxondaryo viloyatlarida yog‘ingarchiliksiz ob-havo bo‘lishi kutilmoqda. Havo harorati 15-20 daraja iliq atrofida bo‘ladi.

27-mart kuni respublikaning ba’zi joylarida yomg‘ir yog‘adi, momaqaldiroq bo‘ladi, shamol 15-20 metr/sekundgacha kuchayadi. Havo harorati kechasi 8-13 daraja iliq, kunduzi 17-22 daraja iliq bo‘ladi.

28-mart kuni O‘zbekistonning shimoliy hududlariga, 29-mart kuni esa respublikaning barcha hududlariga Kavkaz hududlaridan nam va sovuq havo massalari kirib kelishi kutilmoqda. Respublika bo‘yicha yomg‘ir yog‘adi, momaqaldiroq kuzatiladi. Shamol tezligi 15-20 metr/sekundgacha kuchayadi.

Qoraqalpog‘istonda, Xorazm viloyatida 28—29-mart kunlari, Buxoro, Navoiy viloyatlarida 29-mart kuni yog‘ingarchilik kutilmaydi.

Havo harorati 6-11 daraja iliqqacha pasayadi.

Eslatib o‘tamiz, “O‘zgidromet” hafta oxiriga borib yomg‘ir yog‘ishini ma’lum qilgandi.