Toshkentda Yandex Go tomonidan ko‘rsatilgan taksi xizmati uchun to‘lovni bank kartasidan amalga oshirish imkoniyatini ishga tushirgan edi. Naqdsiz to‘lov turi tanlanganda pul avtomatik ravishda kartadan yechib olinadi.
Biroq Spot’ning yozishicha, servisning bir necha foydalanuvchilari hamma haydovchilar ham to‘lovni kartadan qabul qilmayotganidan shikoyat qilgan. Ijtimoiy tarmoqlarda ham shu haqdagi postlar paydo bo‘ldi. Foydalanuvchilar haydovchilar buyurtmalarni qabul qilayotgani, ammo to‘lovni faqat naqd ko‘rinishda olishga rozi bo‘layotganini yozib qoldirgan.
Bir necha haydovchilar o‘z xatti-harakatlarini plastik kartalardan foydalanmasliklari va naqdsiz to‘lov bilan ishlash ularga noqulay ekanligi bilan izohlagan.
“Haydovchilar belgilangan buyurtmadan bosh tortmasligi lozim. Agar shunday vaziyat yuzaga kelgan bo‘lsa, foydalanuvchilarga Yandex Go ilovasi orqali qo‘llab-quvvatlash xizmatiga murojaat qilishini tavsiya etamiz. Agar shikoyatlar takrorlansa, haydovchi servis buyurtmalarini bajarishdan chetlatiladi” — degan Yandex Go matbuot xizmati Spot’ga.
Shuningdek, barcha hamkor taksoparklar va ularning haydovchilari karta orqali to‘lovlar amalga oshirilishi to‘g‘risida avvaldan bir necha bor ogohlantirilgani hamda yangi to‘lov usuli bo‘yicha malaka oshirish kurslaridan o‘tgani ta’kidlangan.
Bundan tashqari, ayrim hollarda ilovada buyurtma berishda karta orqali to‘lov qilishda muammolar kuzatilmoqda: servis kartada pul bo‘lsa ham, uni yechib olishning imkoni bo‘lmaganini bildirmoqda. Kompaniya ushbu muammoni ham bartaraf etishga va’da bergan.
Eslatib o‘tamiz, “Yandeks.Taksi” ilovasi 2020-yilning avgust oyidan Yandex Go nomi ostida faoliyat ko‘rsatishni boshladi. O‘zbekistonda hozircha uning faqatgina taksi va yetkazib berish xizmatidan foydalanish mumkin. Toshkentda ushbu xizmat 2018-yilning aprelida ishga tushgan bo‘lib, hozirda undan Farg‘ona, Marg‘ilon va Namanganda ham foydalanish mumkin.
Izoh (0)