1 апрелдан Россия ва Ўзбекистон ўртасида мунтазам авиақатновлар қайта йўлга қўйилаётгани ҳақида хабар берилганди. Дастлаб Москва—Тошкент йўналишида битта мунтазам рейс бўлади. Мамлакатга кириш истагида бўлган фуқаролар Ўзбекистонда яшаш гувоҳномасига ва Россияга кириш учун бирор асосга эга бўлиши талаб этилади. Бу ҳақда Россиянинг Ўзбекистондаги элчихонасининг консуллик бўлими маълум қилди.
Мазкур рейсдан Россияга кириш бўйича мамлакат ҳукуматининг 2020 йил 16 мартдаги фармойишида назарда тутилган чекловни ҳисобга олмаганда, Ўзбекистонда яшаш гувоҳномасига эга бўлган ўзбекистонлик ва хорижликлар фойдаланиши мумкин.
Авиаташувчилар ва рейслар амалга ошириладиган саналар ҳақида икки мамлакат ўртасида келишувга эришилганидан кейин маълум қилинади.
«Тошкент—Москва йўналишида амалга ошириладиган қолган рейслар чартер бўлиб қолади. Юқорида айтиб ўтилган фармойишга кўра, Россияга кириш учун чипта харид қилишда асос бўлиши шарт», – дейилади хабарда.
Эслатиб ўтамиз, карантин чекловлари туфайли Ўзбекистон ва Россия ўртасидаги авиақатновлар 2020 йилнинг 16 мартида тўхтатилганди. Сентябрь ойида Ўзбекистон соғлиқни сақлаш вазирининг биринчи ўринбосари, Санитария-эпидемиологик осойишталик агентлиги директори Баҳодир Юсупалиев Ўзбекистонда Россия билан авиақатновлар сентябрь ойида тикланиши мумкинлигини айтганди. Аммо Ўзбекистон бош вазири ўринбосари, Республика махсус комиссияси аъзоси Азиз Абдуҳакимов Россия Ўзбекистоннинг мунтазам авиақатновларни тиклаш бўйича таклифини рад этганини маълум қилди.
Изоҳ (0)