Toshkent viloyati Chirchiq shahrida o‘qishga kiritib qo‘yish evaziga 4 ming AQSh dollari so‘ragan institut kafedra mudiri qo‘lga olindi. Bu haqda Bosh prokuratura huzuridagi departament xabar berdi.
Ma’lum qilinishicha, Bosh prokuratura huzuridagi Iqtisodiy jinoyatlarga qarshi kurashish departamenti va IIBBning Toshkent viloyati boshqarmasi tomonidan tezkor tadbir o‘tkazilgan. Tadbir davomida Chirchiq davlat pedagogika institutining A.N. ismli kafedra mudiri fuqaro U.ga uni ushbu institutning jismoniy tarbiya fakulteti sirtqi bo‘limiga o‘qishga kiritib qo‘yishni va’da bergan. Buning evaziga u 4 ming dollar talab qilgan.
A.N. kelishilgan summaning 2 ming dollarini olgan vaqtida ashyoviy dalillar bilan ushlangan.
Mazkur holat yuzasidan A.N. va boshqalarga nisbatan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Qo‘qon davlat pedagogika institutiga o‘qishga kiritib qo‘yishni va’da qilib, 3 ming dollar olgan dekanga sud hukmi o‘qilgani to‘g‘risida xabar berilgandi.
Mavzuga doir:
- Qashqadaryoda o‘qishga kiritib qo‘yishni va’da qilib, 22 kishini 22,5 ming dollarga chuv tushirgan firibgarlar ushlandi
- Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol qo‘lga olindi
- Sirdaryoda fuqaroni Chimkentdagi universitetga 2700 dollar evaziga o‘qishga kiritib qo‘yishni va’da qilgan shaxs ushlandi
Izoh (0)