Italiyada koronavirusning uchinchi to‘lqini sabab davom etayotgan navbatdagi lokdaun vaqtida 22-mart kuni Venetsiya suvlarida ikki delfin paydo bo‘ldi. San-Marko maydonidagi kanallarda ko‘rinish bergan delfinlar ona-bola ekani taxmin qilinmoqda. Bu haqda Padua universiteti veterinari va dotsenti Sandro Matssariol xabar berdi, deb yozmoqda “Korrespondent.net”.
Uning so‘zlariga ko‘ra, hayvonlar katta ehtimol bilan karakatitsa (dengiz mollyusklarining bir turi) ovlagan yoki suv transporti sonining qisqargani tufayli shaharga suzib kirgan. Delfinlar Venetsiya suvlarida taxminan yetti soat kuzatilgan.
Matssariolning aytishicha, shahar hukumati delfinlarni dengizga qaytarib olib borishni tashkillashtirdi: politsiya va sohil xavfsizligi xizmati akustik qurilmalar o‘rnatilgan yettita qayiqdan iborat kichik karvonni suvga tushirdi.
Shunday qilib, hayvonlar Adriatik dengizining ochiq suvlariga chiqarildi.
Avvalroq Yangi Zelandiya janubiy orollarining shimoliy qismi, Kraystcherchning shimoli-g‘arbida joylashgan Faruell-spit qirg‘oqlariga 50 ta qora delfin suzib chiqqani haqida haqida xabar berilgan edi.
Radiostansiya ma’lumotlariga ko‘ra, voqea joyiga yetib kelganlar u yerdan 49 ta qora delfinni topdi. Jonivorlar Golden Bey ko‘rfazining Faruell-spit qismidagi sayoz joylarda turib qolgan.
Izoh (0)