So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.
Venada 7-apreldan boshlab do‘konlarga faqat manfiy natijali testi bo‘lganlar kiritiladi
Avstriya hukumati sharqiy mintaqalarda, shu jumladan, mamlakat poytaxti Venada koronavirusga chalinish holatlarining ko‘pligi tufayli, ko‘pchilik do‘konlarni 1—6-aprel kunlari yopib qo‘yishga qaror qildi. Pasxa bayramlari davrida faqat eng zarur mahsulotlar bilan savdo qiluvchi do‘konlar, masalan, supermarketlar va dorixonalar uchun istisno qilinadi.Savdo-sotiq 7-apreldan qayta tiklanadi. Shundan keyin sharqiy Avstriya aholisi faqat manfiy natijali koronavirus testi bilan do‘konlarga kirishi mumkin, deya ma’lum qildi Avstriya sog‘liqni saqlash vaziri Rudolf Anshober. Ayni paytda manfiy test sartaroshxonalar va xizmat ko‘rsatish sohasining boshqa muassasalariga borishda kerak bo‘ladi.
Bundan tashqari, Avstriyaning sharqiy hududlari aholisiga har qanday binoda, agar u yerda bir nafardan ko‘p odam bo‘lsa, hamda ko‘chada odamlar gavjum joylarda FFP2 respiratorlarini taqish majburiyati yuklatildi. Shuningdek, kompaniyalar o‘z xodimlariga haftasiga bir marta koronavirusga test topshirishni majburiy qildi.
Avstriyada pandemiya boshidan buyon 520 mingdan ortiq kishi koronavirusga chalingan, 9100 dan ortig‘i vafot etgan. Ayni paytda bemorlar soni 30 mingdan oshadi.
Angela Merkel tanqidlardan keyin Pasxa bayramlari davrida lokdaundan voz kechdi
Germaniyada esa kansler Angela Merkel Pasxa bayramlari davrida qat’iy lokdaun joriy qilishdan bosh tortdi. Dastlab qat’iy karantin joriy qilib, eng zarur mahsulotlarni sotadigan do‘konlarni ham yopish rejalashtirilgan edi. Ammo tanqidlar yog‘ilganidan keyin Merkel lokdaun e’lon qilmaydigan bo‘ldi va uzr so‘radi.“Pasxa davrida yopilish g‘oyasini eng yaxshi niyatlar bilan ishlab chiqqan edik. Biz pandemiyaning uchinchi to‘lqinini zudlik bilan to‘xtatishimiz va daf qilishimiz kerak”, — dedi Merkel. Ammo bu choralarni tezkor muddatlarda amalga oshirish imkonsiz, dedi u. Merkel Germaniya aholisidan qo‘shimcha ishonchsizlik uchun uzr so‘radi. “Bu faqat mening xatoim”, — deya qo‘shimcha qildi u.
Pasxa davrida lokdaun joriy qilish qarorini biznes vakillari tanqid ostiga oldi, ular koronavirusga qarshi choralarning susaytirilishiga umid qilayotgan edi. Tibbiy mutaxassislar esa, aksincha, taklif etilayotgan choralar koronavirusning yanada yuqumliroq variantlari tarqalishini to‘xtatish uchun yetarli emas, deb hisoblamoqda.
Germaniya koronavirus infeksiyasini yuqtirgan odamlar soni bo‘yicha dunyoda o‘ninchi o‘rinni egallab turibdi. Mamlakatda jami 2,7 million kishi kasallangan, shularning 75 mingi vafot etgan. Faol bemorlar soni 175 mingdan oshadi.
Gruziyada mashhurlarni emlash uchun vaksinalar ajratiladi
Gruziyada mashhur shaxslarni emlash uchun koronavirusga qarshi qariyb yuzta doza vaksina ajratish rejalashtirilmoqda. Shu tariqa hukumat COVID-19’ga qarshi ommaviy vaksinatsiyani targ‘ib qilmoqchi.“Biz butun dunyo kurashayotgan vaksinadan foydalanmaslikni o‘zimizga ep ko‘rmaymiz. Gruziyada ko‘rsatkichlar juda past, ammo vaksinalarni tezkorlik bilan o‘zlashtirish uchun salohiyat hozircha bor”, — dedi Gruziya sog‘liqni saqlash vaziri o‘rinbosari Tamara Gabuniya.
Uning aytishicha, agar mamlakatda vaksinatsiya sur’atlari oshmasa, hukumat 55 yoshdan oshganlarni emlashga ruxsat beradi, shuningdek, ehtimoliy ikkilamchi ta’sirlar oldini olish uchun emlanganlar 30 daqiqa emas, 45 daqiqa davomida kuzatuvda bo‘ladi.
Ayni paytda Gruziya aholisi AstraZeneca Angliya-Shvetsiya kompaniyasi vaksinasi bilan emlanmoqda. Shuningdek, mamlakatga Amerika-Germaniya vaksinasi — Pfizer ham yetib kelishi kutilmoqda.
Shuningdek:
- Jons Hopkins universiteti ma’lumotlariga ko‘ra, AQShda koronavirusga chalinganlar soni 30 million kishidan oshdi. Mamlakat ushbu ko‘rsatkich bo‘yicha dunyoda birinchi o‘rinni egallab turibdi. Undan keyinda Braziliya (12,1 million), Hindiston (11,7 million) bormoqda. Shuningdek, koronavirusdan o‘limlar soni bo‘yicha ham AQSh dunyoda yetakchilik qilmoqda — 545,1 ming kishi. Braziliyada esa 298,6 ming, Meksikada 199 ming kishi COVID-19’dan vafot etgan.
- Ukrainaning Chernovitskaya viloyatida AstraZeneca vaksinasi bilan emlangan erkak oradan o‘n kun o‘tib, vafot etdi. O‘lim sababi sifatida o‘tkir miya insulti keltirilmoqda. Unda, shuningdek, og‘ir surunkali yurak-qon tomir kasalliklari, diabet va boshqa hamroh kasalliklar bo‘lgani aytilmoqda. U 15-mart kuni Oxford/AstraZeneca dorisi (Covishield) bilan emlangan, o‘limi esa 24-mart kuni qayd etilgan.
- Xorvatiya bosh vaziri Andrey Plenkovich va sog‘liqni saqlash vaziri Gordan Yandrokovich AstraZeneca vaksinasi bilan koronavirusga qarshi emlandi. Mamlakatda COVID-vaksinatsiya 2020-yil 27-dekabrda boshlangan bo‘lib, hozirgacha 311 mingdan ortiq aholi emlangan.
- Hindistonda koronavirusga chalinish avj olib ketgani tufayli, mamlakat o‘z hududida ishlab chiqarilayotgan AstraZeneca vaksinasining chet elga yetkazib berilishini to‘xtatadi va o‘z fuqarolarini emlash kampaniyasini kengaytiradi. Hindistonda 1-apreldan 45 yoshdan oshgan barcha aholini emlash uchun ruxsat berildi.
Izoh (0)