Shimoliy Koreya ballistik raketa uchirdi. Bu haqda Yaponiya Mudofaa vazirligining bayonotiga asoslanib, “RBK” xabar berdi.
Vazirlik ma’lumotlariga ko‘ra, raketaning uchirilishi mahalliy vaqt bilan soat 7:00 da (Toshkent vaqti bilan 3:00) amalga oshirilgan. Vazirlik raketa Yaponiya hududiga o‘tmasligini ma’lum qilgan. Uning parvoz trayektoriyasi mamlakatning maxsus iqtisodiy zonasidan chiqib ketmaydi.
Kyodo agentligining xabar berishicha, Yaponiya bosh vaziri Yosixide Suga Shimoliy Koreyaning ballistik raketa uchirishi munosabati bilan Milliy xavfsizlik kengashi majlisini chaqirdi
Yaponiya Mudofaa vazirligi raketa uchirilishini “butun xalqaro hamjamiyat, shu jumladan, Yaponiya uchun jiddiy muammo” deb atagan. Shimoliy Koreyaning harakatlari Yaponiya bosh vaziri tomonidan ham qoralangan.
“Raketaning uchirilishi mamlakatimiz va mintaqamiz tinchligi hamda xavfsizligiga tahdid soladi, shuningdek, BMT qaroriga zid keladi”, — dedi Suga.
YTN agentligining yozishicha, mazkur masala yuzasidan Janubiy Koreya hukumati ham favqulodda yig‘ilish chaqirgan.
Avvalroq Shimoliy Koreyaning qanotli raketalarni sinovdan o‘tkazgani haqida xabar berilgandi. Xabarga ko‘ra, Sariq dengiz mintaqasidan ikkita raketa uchirilgan.
The Washington Post gazetasining xabar berishicha, AQSh Mudofaa vazirligi vakillari razvedka ma’lumotlari Shimoliy Koreyaning raketa sinovlarini rejalashtirayotgani haqida ogohlantirgan edi.
Gazetaning yozishicha, xabar qilinmagan raketa sinovlari KXDR yetakchisi Kim Chen Inning AQSh prezidenti Jo Baydenga bo‘lgan birinchi to‘g‘ridan to‘g‘ri da’vosini anglatadi.
Shu bilan birga, AQSh ma’muriyati Shimoliy Koreya o‘tkazgan qisqa masofaga uchadigan raketalarning sinovini keng ko‘lamli provokatsiya deb hisoblamayapti. Ma’muriyat vakillaridan biri amalga oshirilgan sinovlar BMT Xavfsizlik Kengashining KXDR to‘g‘risidagi qarorlariga zid emasligini qo‘shimcha qilgan va ularni “normal harbiy faoliyat” deb atagan.
Avvalroq Oq uy fevral o‘rtalaridan buyon bir nechta diplomatik kanallar, shu jumladan, Nyu-Yorkdagi kanallar orqali Pxenyan bilan bog‘lanishga urinib kelgani, ammo Shimoliy Koreya rahbariyati bu urinishlarni e’tiborsiz qoldirganini aytgan edi.
Shimoliy Koreya hukumati esa Vashington Pxenyanga nisbatan dushmanlik siyosatidan voz kechmaguncha AQShning yangi ma’muriyati bilan aloqa o‘rnatmasligini aytdi. KXDR tashqi ishlar vaziri o‘rinbosarining ta’kidlashicha, Pxenyan va Vashington o‘rtasidagi muloqot “bir stolda teng huquqli o‘tirib, fikr almashish” muhitini talab qiladi.
Izoh (0)