Prezident Shavkat Mirziyoyev raisligida 24-mart kuni o‘tkazilgan yig‘ilishda energetika vaziri Alisher Sultonov 2021-yil kuz—qish mavsumigacha bajariladigan ishlar bo‘yicha so‘z yuritdi, deya xabar bermoqda “Daryo” muxbiri.
“Hurmatli Prezident, elektr tarmoqlari bo‘yicha 2021-yilning oktabr oyigacha amalga oshiradigan ishlarimiz to‘g‘risida hisobot bersam. Tahlillarga ko‘ra, 25 yil davomida, ya’ni 2016-yilgacha 9 ming 300 kilometr elektr tarmoqlari qurilib, 4 ming 800 ta transformator o‘rnatilgan. Oxirgi 4 yilda esa 25 ming kilometr elektr tarmoqlari qurilgan, 8 ming 900 yangi transformator qo‘yilgan. 25 yilga nisbatan so‘nggi 4 yilda 2,5 baravar ko‘p ish qilingan.
Shuni alohida ta’kidlash kerakki, yangi tizim bo‘yicha ham ishlar olib boryapmiz. Birinchidan, biz mahallabay ishlab, mahallalarni ‘og‘ir’ va ‘o‘ta og‘ir’ toifalarga bo‘ldik.
Ikkinchidan, mahallalarda yangi quriladigan elektr tarmoqlari va transformatorlarni qabul qilishda MFY raislari ham qatnashadigan mexanizmni joriy etdik.
Uchinchidan, temirbeton tarmoqlar va transformator ishlab chiqaradigan 13 ta korxonani ishga tushirdik. 2021-yilning o‘zida elektr tarmoqlari tizimida jami 430 million dollarlik ishlar amalga oshiriladi. Bunday mablag‘lar tarixda ajratilmagan”, — dedi Sultonov.
Bundan avval O‘zbekistonda tadbirkorlarning elektr ta’minotiga ulanishi uchun yig‘im joriy etilishi kutilayotgani, 2021-yilda ham elektr energiyasining narxi oshmasligi kutilayotgani hamda 5377 ta mahallaning elektr ta’minotini yaxshilash uchun 15 ming kilometr elektr uzatish tarmoqlari va 4 mingta transformator yangilanishi haqida xabar berilgandi.
Izoh (0)