Toshkent viloyatining Qibray tumanida qarzdor erdan uning ayoli foydasiga kompensatsiya pullari undirib berildi. Bu haqda MIB matbuot xizmati “Daryo”ga xabar berdi.
MIB Qibray tuman bo‘limi ish yurituviga Fuqarolik ishlari bo‘yicha Toshkent viloyati Chirchiq tumanlararo sudining 19-fevraldagi ijro varaqasiga asosan, qarzdor er S.D.dan undiruvchi ayol M.D. foydasiga Spark rusumli avtomashinadagi ayolga tegishli bo‘lgan teng yarim ulush, ya’ni 32 million 775 ming so‘m kompensatsiya pullari undirish to‘g‘risidagi ijro hujjati 23-mart kuni kelib tushgan.
Mazkur ijro hujjati ijro ishi yuritishni qo‘zg‘atish to‘g‘risida qaror qabul qilinib, qaror nusxalari taraflarga yuborilgan. Ijro harakatlari davomida qarzdorga tegishli bo‘lgan Spark rusumli avtomashina 23-mart kuni xatlanib, tegishli tartibda xolislar ishtirokida dalolatnoma rasmiylashtirilgan.
Olib borilgan majburiy ijro harakatlari davomida shu kuni qarzdordan 32 million 775 ming so‘m kompensatsiya pullari undiruvchiga tilxat asosida undirib berilgan.
Avvalroq Buxoroda 100 oy davomida aliment to‘lashdan bo‘yin tovlab, qochib yurgan ota 15 sutkaga qamalgani, samarqandlik ota farzandlari ta’minoti uchun 246 million so‘m aliment pulini oldindan to‘lab bergani, farg‘onalik ota uch farzandining aliment puli o‘rniga uy hadya qilgani, Buxoroda alimentdan qarzdor ota farzandlariga mashina va ikki xonali kvartira bergani haqida xabar berilgan edi.
Izoh (0)