Buxoro va Jizzaxdagi neft bazalarida neft mahsulotlarining saqlanishi, iste’molchilarga yetkazib berilishi, debitorlik, kreditor qarzdorliklar bilan ko‘plab noo‘rin xarajatlar, shuningdek, amaldagi qonunchilikka rioya qilinmaslik holatlari aniqlandi, deb xabar beradi “O‘zbekneftgaz” matbuot xizmati.
Vazirlar Mahkamasining 2018-yil 28-fevraldagi 149-sonli qaroriga asosan, neft mahsulotlari to‘lov oldindan 100 foiz o‘tkazilganda yetkazib berilishi belgilangan bo‘lsa-da, amalda belgilangan me’yoriy hujjatlarga muntazam amal qilmaslik oqibatida “Buxoro neft bazasi” MChJda salkam 33,5 milliard so‘m, “Jizzax neft bazasi” MChJda esa 35,4 milliard so‘mdan ortiq debitor qarzdorlik yuzaga kelgan.
Shundan umumiy hisobda 45,293 milliard so‘mi 2021-yil 1-yanvar holati bo‘yicha muddati o‘tgan qarz sanaladi.
Bundan tashqari, o‘z vaqtida undiruv choralari ko‘rilmagani natijasida, “Buxoro neft bazasi” MChJ bo‘yicha 2009—2013-yillarga oid 1,8 milliard so‘m va “Jizzax neft bazasi” MChJ bo‘yicha 2006—2020-yillarga oid 14,1 milliard so‘m mablag‘ “umidsiz qarz”ga aylangan.
Shu bilan birga, yoqilg‘i yetkazib berilgan Buxorodagi 32 ta, Jizzaxdagi 239 ta sobiq xo‘jalik faoliyati bugungi kunda tugatilgan va qarzdorliklarni undirish masalasi yana bir qator muammolarni tug‘dirmoqda.
O‘rganish davomida “Buxoro neft bazasi” MChJga qarashli 67 ta FYoTShda 3,1 million litr, “Jizzax neft bazasi” MChJ tasarrufidagi FYoTSh va PAZSlarda 8 million litr mahsulot kamomadi aniqlangan. Shundan bir qismi jarayonda qoplangan.
Bundan tashqari, aniqlanishicha, ushbu neft bazalaridagi intizomiy jazo qo‘llanilgan xodimlarga mukofot pullari to‘lab berilgan, mehnat shartnomasi bekor qilingan sobiq xodimlarga esa oylik ish haqi yozib kelingan.
O‘rganishlarda aniqlangan kamchiliklarni undirish va vaziyatga huquqiy baho berish uchun o‘rganish hujjatlari tegishli tartibda huquqni muhofaza qiluvchi idoralarga taqdim etilgan.
Izoh (0)