O‘zbekistonda 2021-yil yakuniga qadar 1 trillion so‘m evaziga 4 ming kilometrdan ortiq suv tarmoqlari tortilib, 500 ta mahallaga toza ichimlik suvi yetkaziladi. Bu haqda Prezident Shavkat Mirziyoyev raisligida “Obod qishloq” va “Obod mahalla” dasturlarini 2021-yilda amalga oshirish masalalari muhokamasiga bag‘ishlab o‘tkazilgan videoselektor yig‘ilishida ma’lum qilindi, deya xabar bermoqda “Daryo” muxbiri.
“Ijtimoiy-iqtisodiy ahvoli eng og‘ir 325 ta qishloq va 71 ta shahar mahallalarini kompleks rivojlantirish, ularga ichimlik suvi, elektr tarmoqlari, ichki yo‘llar va ijtimoiy soha obyektlarini qurish hamda ta’mirlash ishlari uchun 3,3 trillion so‘m ajratiladi.
Shuningdek, 2 ming 721 ta mahallada 10 ming kilometrdan ortiq ichki yo‘llarni ta’mirlashga 2 trillion so‘m beriladi. Shu bilan birga, 1 trillion so‘m evaziga 4 ming kilometrdan ortiq suv tarmoqlari tortilib, 500 ta mahallaga toza ichimlik suvi yetkaziladi. Elektr ta’minotini yaxshilash maqsadida 5 ming 377 ta (60 foiz) mahallada 15 ming kilometr elektr uzatish tarmoqlari va 4 mingdan ortiq transformatorlar yangilanadi. Bu ishlarga qariyb 2,1 trillion so‘m yo‘naltiramiz.
Bundan tashqari, Jahon banki va Osiyo infratuzilmaviy investitsiyalar banki bilan birga ‘qishloq infratuzilmasini rivojlantirish’ loyihasi doirasida Farg‘ona, Andijon, Namangan, Sirdaryo va Jizzax viloyatlarining 21 ta tumani, 60 ta qishlog‘ida 485 milliard so‘mlik yoki 46 million dollarlik loyihalar boshlanadi”, — dedi davlat rahbari.
Mavzuga doir:
- Shavkat Mirziyoyev: “Haqiqiy obod mahallada ‘temir daftar’, ‘ayollar’ va ‘yoshlar’ daftarlari bo‘lmasligi kerak”
- “137 ta mahalladagi 431 ta ikki qavatli uy avariya holatida” — Shavkat Mirziyoyev
- O‘zbekistondagi qishloq va mahallalarda aholi sharoitini yaxshilash uchun 2021-yilda jami 21 trln so‘m mablag‘ yo‘naltiriladi
Izoh (0)