Президент Шавкат Мирзиёев раислигида 24 март куни ўтказилган йиғилишда энергетика вазири Алишер Султонов 2021 йил куз—қиш мавсумигача бажариладиган ишлар бўйича сўз юритди, дея хабар бермоқда «Дарё» мухбири.
«Ҳурматли Президент, электр тармоқлари бўйича 2021 йилнинг октябрь ойигача амалга оширадиган ишларимиз тўғрисида ҳисобот берсам. Таҳлилларга кўра, 25 йил давомида, яъни 2016 йилгача 9 минг 300 километр электр тармоқлари қурилиб, 4 минг 800 та трансформатор ўрнатилган. Охирги 4 йилда эса 25 минг километр электр тармоқлари қурилган, 8 минг 900 янги трансформатор қўйилган. 25 йилга нисбатан сўнгги 4 йилда 2,5 баравар кўп иш қилинган.
Шуни алоҳида таъкидлаш керакки, янги тизим бўйича ҳам ишлар олиб боряпмиз. Биринчидан, биз маҳаллабай ишлаб, маҳаллаларни ‘оғир’ ва ‘ўта оғир’ тоифаларга бўлдик.
Иккинчидан, маҳаллаларда янги қуриладиган электр тармоқлари ва трансформаторларни қабул қилишда МФЙ раислари ҳам қатнашадиган механизмни жорий этдик.
Учинчидан, темирбетон тармоқлар ва трансформатор ишлаб чиқарадиган 13 та корхонани ишга туширдик. 2021 йилнинг ўзида электр тармоқлари тизимида жами 430 миллион долларлик ишлар амалга оширилади. Бундай маблағлар тарихда ажратилмаган», — деди Султонов.
Бундан аввал Ўзбекистонда тадбиркорларнинг электр таъминотига уланиши учун йиғим жорий этилиши кутилаётгани, 2021 йилда ҳам электр энергиясининг нархи ошмаслиги кутилаётгани ҳамда 5377 та маҳалланинг электр таъминотини яхшилаш учун 15 минг километр электр узатиш тармоқлари ва 4 мингта трансформатор янгиланиши ҳақида хабар берилганди.
Изоҳ (0)