Bugun,

  • USD 11095.31
  • RUB 173.84
  • EUR 10772.44

Tojikiston Yevropaning yarmi rad etgan AstraZeneca vaksinasini rad etmasligi ma’lum qilindi. Bu haqda mamlakat sog‘liqni saqlash vaziri o‘rinbosari Samariddin Alizoda vazirlikda bo‘lib o‘tgan matbuot anjumanida aytib o‘tdi, deb yozadi Asia-Plus.

Samariddin Alizoda.

Samariddin Alizoda.
Foto: Asia-Plus

“Tojikiston AstraZeneca vaksinasini rad etmaydi, biz uni mamnuniyat bilan qabul qilamiz”, — dedi Tojikiston sog‘liqni saqlash vaziri o‘rinbosari Samariddin Alizoda.

Sog‘liqni saqlash vaziri o‘rinbosarining so‘zlariga ko‘ra, mamlakatda aholini koronavirus infeksiyasiga qarshi emlash bo‘yicha milliy dastur qabul qilingan. Ushbu dastur doirasida har bir emlangan kishining ahvolini nazorat qilib borish ko‘zda tutilgan. Ikkilamchi ta’sirlar yuzasidan barcha holatlar keyingi tahlillar uchun Sog‘liqni saqlash vazirligi tomonidan ro‘yxatga olinadi.

“Biz tayyorgarlik ko‘ryapmiz, vaksinatsiya bo‘yicha barcha chora-tadbirlarni amalga oshirmoqdamiz. Shu bilan birga, ushbu vaksina atrofida sodir bo‘layotgan voqealarning hech birini ko‘zdan qochirmayapmiz”, — vazir o‘rinbosari.

Eslatib o‘tamiz, COVAX dasturi doirasida 8-mart kuni Hindistondan Dushanbega COVID-19’ga qarshi 192 ming doza Covishield vaksinasi yetkazib berildi. Ushbu vaksina Oksford-AstraZeneca vaksinasi, ammo Hindistonda ishlab chiqarilgan bo‘lib, Covishield kodi ostida JSST tomonidan ro‘yxatdan o‘tgan. Alizodaning so‘zlariga ko‘ra, COVAX dasturi doirasida aholining 20 foizini emlash nazarda tutilmoqda. Umuman olganda, Tojikiston ushbu dastur doirasida 624 ming dozada vaksina oladi.

Covishield haqida gapirar ekan, vazir o‘rinbosari Hindistondagi Serum instituti o‘zini sifatli vaksinalar ishlab chiqaradigan professional institut sifatida namoyon qilgan, deya ta’kidladi.

“So‘nggi yillarda biz poliomiyelit (bolalardagi falajlik), qizamiq va boshqa kasalliklarga qarshi vaksinalarni Hindistonning Serum institutidan olib kelmoqdamiz. Bu vaqt davomida ularning vaksinalaridan jiddiy ikkilamchi ta’sirlarni ko‘rmadik. Covishield vaksinasi ishlab chiqariladigan Hindistonning Serum instituti Jahon sog‘liqni saqlash tashkilotining sertifikatlangan klinikasidir ”, — dedi vazir o‘rinbosari.

Alizoda Yevropa mamlakatlari Yevropada ishlab chiqarilgan AstraZeneca vaksinasidan foydalanayotganini, boshqa mamlakatlarga esa vaksina Hindistondan yetkazib berilayotganini ta’kidlab, asosan, Ukraina, Moldova va kuni kecha O‘zbekiston ushbu vaksinani qabul qilib olganini aytdi.

Vaksinani respublika hududida ro‘yxatdan o‘tkazish to‘g‘risidagi savolga vazir o‘rinbosari AstraZeneca allaqachon Tojikistonda ro‘yxatdan o‘tganini aytib, javob berdi. Uning so‘zlariga ko‘ra, hozirda Rossiyaning “Sputnik V” va Xitoyning CoronaVac vaksinasini ro‘yxatdan o‘tkazish ishlari olib borilmoqda.

Vazir o‘rinbosarining so‘zlariga ko‘ra, ayni paytda Tojikiston boshqa davlatlardan, xususan, Rossiya va Xitoydan vaksinalar olish ustida ishlamoqda. Buning uchun Jahon banki va Osiyo taraqqiyot banki yordam bermoqda.

Alizodaning aytishicha, Tojikiston fuqarolari qaysi vaksina bilan emlanishini o‘zlari tanlashi mumkin. U vaksinatsiyani boshlash sanasini hali aniq aytmadi, ammo preparatni birinchi navbatda tibbiyot xodimlari qabul qilishini aytdi. Ularning barchasi mamlakatning boshqa fuqarolari singari vaksinani ixtiyoriy va bepul oladi.

Bir kishiga ikki doza vaksina 8—12 hafta oralig‘ida yuboriladi. Emlanganidan so‘ng fuqarolarga Yevropaning “yashil pasporti” analogi bo‘lgan maxsus sertifikat beriladi.

“Shuningdek, xususiy klinikalar ham koronavirusga qarshi vaksinani sotib olishi mumkin. Ammo buning uchun ular preparatni Sog‘liqni saqlash vazirligida ro‘yxatdan o‘tkazishi kerak”, — dedi vazir o‘rinbosari.

Eslatib o‘tamiz, dunyoda AstraZeneca vaksinasi orqali ommaviy emlashlar boshlanganidan so‘ng vaksinani qabul qilganlar orasida kasalxonaga yotqizish va o‘lim holatlari kuzatila boshladi. O‘lim holatini o‘rgangan shifokorlar ushbu dori bilan emlanganlarda tromblar hosil bo‘lganini aniqladi.

Shundan so‘ng bir qator mamlakatlar preparatdan foydalanishni to‘xtatib qo‘ydi. Xususan, Germaniya, Fransiya, ItaliyaIspaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo va Janubiy Afrika mamlakatlarida mazkur vaksinadan foydalanish to‘xtatilgan.

JSST AstraZeneca vaksinasidan foydalanishni to‘xtatishga sabab ko‘rmayotganini ma’lum qildi. Keyinroq AstraZeneca emlashning nojo‘ya ta’siri to‘g‘risidagi xabarlarga javob berdi. O‘zbekistonda esa ushbu vaksinadan foydalanish davom etishi ma’lum qilindi.

Vaksina 17-mart kuni Toshkent xalqaro aeroportiga olib kelindi.

Izoh
Asosiy yangiliklar
Dunyo
AQSH Suriyada ISHID yetakchisi o‘ldirilganini tasdiqladi
Dunyo
“Oyiga 2,5 ming kishigacha”. AQSH Ukraina harbiylarini o‘qitish dasturini kengaytirmoqchi
Dunyo
AQSH Eron yadro dasturini harbiy yo‘l bilan to‘xtatishga tayyorligini bildirdi