O‘zbekistonda 2021-yilda ham oliy ta’lim muassasalariga kirish imtihonlari stadionlarda o‘tkazilishi mumkin. Bu AOKAda o‘tkazilgan matbuot anjumanida Davlat test markazi boshqarma boshlig‘i Farhod Mirzayev ma’lum qildi.
Ta’kidlanishicha, ayni paytda DTM tomonidan testlarni o‘tkazish bo‘yicha ikki xil ssenariy ustida ish olib borilmoqda:
- an’anaviy shaklda katta sig‘imli binolarda o‘tkazish;
- pandemiya sharoitidagi kabi ochiq maydonlarda o‘tkazish.
Shuningdek, Mirzayev abituriyentlarga OTMlarga kirish uchun imtiyoz berish, ularni tasdiqlash vakolatiga ega bo‘lgan mas’ul vazirlik va idoralar bilan imtiyozlar reyestri shakllantirilayotganini ma’lum qilgan. Buning uchun Davlat test markazi tomonidan maxsus platforma ishlab chiqilib, tegishli vazirlik va idoralarga imtiyozlarni kiritish uchun imkoniyati taqdim etilgan.
DTM mas’ulining so‘zlariga ko‘ra, 2021/2022-o‘quv yili uchun test sinovlarida 1,6 million nafar abituriyent ishtirok etishi kutilmoqda. Uning ta’kidlashicha, hujjatlar bu yil ham onlayn qabul qilinadi.
“2021/2022 o‘quv yili uchun respublika oliy ta’lim muassasalarining bakalavriati ta’lim yo‘nalishlariga kirish test sinovlarida 1,6 million nafar abituriyent ishtirok etishi kutilmoqda. 2021-yilda abituriyentlarni ro‘yxatga olish DTMning rasmiy veb-sayti (my.dtm.uz) va Yagona interaktiv davlat xizmatlari portali (my.gov.uz) orqali onlayn amalga oshiriladi”, — deydi u.
Eslatib o‘tamiz, 2020-yilda OTMga kirish uchun o‘tkaziladigan imtihonlar stadionlarda bo‘lib o‘tgan edi, imtihonlar 2-sentabrdan boshlangan.
Avvalroq O‘zbekistonda oliygohlarga kirish uchun topshiriladigan test sinovi fanlar majmuasi tasdiqlangan edi.
Izoh (0)