Samarqand viloyati IIB YHXB xodimlari tomonidan viloyatda karantin qoidalariga rioya qilish bo‘yicha targ‘ibot tadbirlari olib borilmoqda, deb xabar beradi IIV YHXBB axborot xizmati.

Ma’lum qilinishicha, targ‘ibot tadbirlari davomida yo‘llarda harakatlanayotgan haydovchi, yo‘lovchi va piyodalarda tibbiy niqoblar tarqatilmoqda. YPX inspektorlari tomonidan niqob taqmagan haydovchisi bor mashinalar, shuningdek, niqobsiz yo‘lovchilari bor jamoat transportlari to‘xtatilib, ularga karantin qoidalarini buzmaslik bo‘yicha tushunchalar berilgan.

Avvalroq O‘zbekistonning qator viloyatlarida karantin qoidalarini buzganlarni javobgarlikka tortish holatlari ko‘paygani to‘g‘risida xabar berilgandi. Ma’lumotlarga ko‘ra, so‘nggi uch sutka ichida O‘zbekistonda karantin qoidalarini buzgan 947 kishi javobgarlikka tortilgan.

Eslatib o‘tamiz, Ma’muriy javobgarik to‘g‘risidagi kodeksning 54-moddasida epidemiyalarga qarshi kurash qoidalarini buzganlik uchun javobgarlik choralari belgilangan. Ushbu moddaga ko‘ra, karantinli va inson uchun xavfli bo‘lgan boshqa yuqumli kasalliklar paydo bo‘lishi hamda tarqalishi sharoitida vakolatli organning maxsus talablariga zid ravishda jamoat joylarida niqobsiz bo‘lish — bazaviy hisoblash miqdorining 5 baravarigacha (1 million 225 ming so‘m) miqdorda jarima solishga sabab bo‘ladi.