18-mart kuni soat 9:20 atrofida Sirdaryo viloyati Boyovut tumanida kuchli shamol esishi kuzatildi. Bu haqda viloyat hokimligi matbuot xizmati xabar berdi.
Shamol oqibatida “Xalq banki” filiali binosining tom qismi qulab tushgan. Uchib ketgan tom qismi binoning janubi-g‘arbiy, odatda, fuqarolar bo‘lmaydigan qismiga tushgan, jabrlanganlar yo‘q.
Hodisa oqibatda Boyovut tumanidagi “Sohil”, “Beruniy”, “Uchturgon” va “Alisher Navoiy” mahallalariga yo‘naltirilgan tarmoq elektr energiya uzatishdan vaqtincha uzilgani aytilmoqda. Bundan tashqari, daraxtning shamol ta’sirida qulashi natijasida “Madaniyat”, “Uchturgon” va “Olmazor” mahallalarida ham elektr energiya uzatish vaqtincha to‘xtatilgan.
Yuzaga kelgan noqulayliklar bugun soat 15:00 ga qadar bartaraf etilishi ta’kidlanmoqda.
Shuningdek, viloyatning Xovos tumani “Sohibkor” MFYda joylashgan 11-uyning tom yopilmalari kuchli shamol oqibatida uchib tushgan.
Telegram’dagi gidrometerologik ilmiy tahlillar, ob-havo bashoratlari, tadqiqotlar, ma’ruzalar kanali 18-mart tongida Toshkent viloyati Bekobod tumanida kuchli shamol bo‘lishi haqida yozgan edi. “Bu Bekobod yoki Xovos shamollari deyilib, uning yo‘nalishi sharqdan g‘arbga tomon yo‘nalganiga sharqiy shamol hisoblanadi. Odatda, Bekobod shamollari bahor-yoz oylari antisiklon periferiyasining oxirgi bosqichida yuzaga keladi. Yozda esgan shamol qum-changli bo‘lib, qishloq xo‘jaligi ekinlariga zarar keltiradi. Shamolning maksimal tezligi 28 metr/soniyagacha kuchayishi mumkin”, — deyiladi xabarda.
Eslatib o‘tamiz, 30-yanvar kuni Xovos tumanida kuzatilgan kuchli shamol 2019-yilda kapital ta’mirlangan binoning tomini uchirib yuborgan edi.
Izoh (0)