Axborotlashtirish va telekommunikatsiyalar sohasida nazorat bo‘yicha davlat inspeksiyasi “O‘zbekiston Respublikasining Jinoyat va Ma’muriy javobgarlik to‘g‘risidagi kodekslariga o‘zgartirish va qo‘shimchalar kiritish haqida”gi qonun loyihasini muhokamaga qo‘ydi.
Unga ko‘ra, shaxsiy hayot daxlsizligini buzish, ya’ni shaxsga doir ma’lumotlarni qonunga xilof ravishda oshkor etish, tarqatish, egasizlantirish, o‘zgartirish, ishlab berish, qonun bilan belgilangan mulkdor va operator tomonidan shaxsga doir ma’lumotlarni himoya qilish bo‘yicha zarur huquqiy, tashkiliy va texnik choralarni ko‘rmaslik, shaxsga doir ma’lumotlar o‘zgargan taqdirda bu haqda vakolatli davlat organini xabardor etmaslik, basharti ushbu harakatlar, ma’muriy jazo qo‘llanilganidan keyin sodir etilgan bo‘lsa, BHMning 100 baravaridan 150 baravarigacha miqdorda (24,5 milliondan 36,75 million so‘mgacha) jarima yoki 3 yilgacha muayyan huquqdan mahrum qilish yoxud 2 yilgacha axloq tuzatish ishlari bilan jazolanadi.
Shuningdek, shaxsga doir ma’lumotlar to‘g‘risidagi qonun hujjatlarini buzganlik holati ma’muriy jazo qo‘llanilganidan keyin sodir etilgan bo‘lsa, BHMning 150 baravaridan 200 baravarigacha (amaldagi tartibda 50 baravarigacha) miqdorda jarima yoki 2 yildan 3 yilgacha axloq tuzatish ishlari (amaldagi tartibda 2 yilgacha) yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilish bilan jazolanadi.
Avvalroq Shavkat Mirziyoyev “O‘zbekiston Respublikasining Jinoyat va Jinoyat-protsessual kodekslariga o‘zgartish va qo‘shimchalar kiritish to‘g‘risida”gi qonunni imzolagani, unga ko‘ra, O‘zbekistonda jinoyat ishlari bo‘yicha aybga iqrorlik to‘g‘risida kelishuv joriy qilingani to‘g‘risida xabar berilgandi.
Izoh (0)