Ўзбекистонда 2021 йилда ҳам олий таълим муассасаларига кириш имтиҳонлари стадионларда ўтказилиши мумкин. Бу АОКАда ўтказилган матбуот анжуманида Давлат тест маркази бошқарма бошлиғи Фарҳод Мирзаев маълум қилди.
Таъкидланишича, айни пайтда ДТМ томонидан тестларни ўтказиш бўйича икки хил сценарий устида иш олиб борилмоқда:
- анъанавий шаклда катта сиғимли биноларда ўтказиш;
- пандемия шароитидаги каби очиқ майдонларда ўтказиш.
Шунингдек, Мирзаев абитуриентларга ОТМларга кириш учун имтиёз бериш, уларни тасдиқлаш ваколатига эга бўлган масъул вазирлик ва идоралар билан имтиёзлар реестри шакллантирилаётганини маълум қилган. Бунинг учун Давлат тест маркази томонидан махсус платформа ишлаб чиқилиб, тегишли вазирлик ва идораларга имтиёзларни киритиш учун имконияти тақдим этилган.
ДТМ масъулининг сўзларига кўра, 2021/2022-ўқув йили учун тест синовларида 1,6 миллион нафар абитуриент иштирок этиши кутилмоқда. Унинг таъкидлашича, ҳужжатлар бу йил ҳам онлайн қабул қилинади.
«2021/2022 ўқув йили учун республика олий таълим муассасаларининг бакалавриати таълим йўналишларига кириш тест синовларида 1,6 миллион нафар абитуриент иштирок этиши кутилмоқда. 2021 йилда абитуриентларни рўйхатга олиш ДТМнинг расмий веб-сайти (my.dtm.uz) ва Ягона интерактив давлат хизматлари портали (my.gov.uz) орқали онлайн амалга оширилади», — дейди у.
Эслатиб ўтамиз, 2020 йилда ОТМга кириш учун ўтказиладиган имтиҳонлар стадионларда бўлиб ўтган эди, имтиҳонлар 2 сентябрдан бошланган.
Мавзуга доир: Очиқ осмон остида ўтаётган Ўзбекистон ОТМларига кириш имтиҳонлари акс этган сурат The New York Times муқовасидан ўрин олди
Изоҳ (0)