Norvegiyada AstraZeneca vaksinasi bilan emlanganidan keyin shifoxonaga yotqizilgan tibbiyot xodimi vafot etdi. Bu haqda “RIA Novosti” xabar berdi.
13-mart kuni Oslo shahrida uch nafar tibbiyot xodimi koronavirusga qarshi emlangandan keyin paydo bo‘lgan tromblar tufayli shifoxonaga yotqizilgan.
Norvegiya dori-darmon vositalari agentligining direktori Steynar Madsenning so‘zlariga ko‘ra, tibbiyot xodimlaridan biri vafot etgan. Mutaxassislar vaziyatni o‘rganmoqda va tibbiyot xodimlaridan bunday holatlar to‘g‘risida tezkor xabar berishlarini so‘ramoqda.
“Universitet shifoxonasi qonida tromblar hosil bo‘lgan uch nafar tibbiyot xodimining orasida umumiy jihatlar mavjudligini tekshirmoqda. Shuningdek, ular ushbu holatni chet elda aniqlangan shunday holatlar bilan taqqoslaydi”, — dedi Madsen.
Mutaxassislar vaksinaning nojo‘ya ta’sirlarini milliy va Yevropa darajasida tekshirmoqda, — dedi agentlik vakili.
Shuningdek, Xorvatiyada AstraZeneca vaksinasi bilan emlangandan keyin 91 yoshli ayol vafot etdi. Ta’kidlanishicha, bemor o‘pka emboliyasi tufayli vafot etgan. Avvalroq u AstraZeneca vaksinasi bilan emlangan edi.
Emlanganlarda tromblar paydo bo‘lishi bilan bog‘liq bir nechta holatlar haqidagi ma’lumotlardan keyin Daniya AstraZeneca vaksinasidan foydalanishni ikki haftaga to‘xtatib qo‘ydi. Bunday holatlardan biri o‘lim bilan tugagan.
Avvalroq AstraZeneca kompaniyasining vakili vaksinaning yuzaga kelishi mumkin bo‘lgan nojo‘ya ta’sirlari sababli Yevropaning bir nechta mamlakatlarida taqiqlangani haqida xabarlarga munosabat bildirgandi.
Izoh (0)