Норвегияда тиббиёт ходими AstraZeneca вакцинаси билан эмланганидан кейин вафот этди

Норвегияда AstraZeneca вакцинаси билан эмланганидан кейин шифохонага ётқизилган тиббиёт ходими вафот этди. Бу ҳақда «РИА Новости» хабар берди.

13 март куни Осло шаҳрида уч нафар тиббиёт ходими коронавирусга қарши эмлангандан кейин пайдо бўлган тромблар туфайли шифохонага ётқизилган.

Норвегия дори-дармон воситалари агентлигининг директори Стейнар Мадсеннинг сўзларига кўра, тиббиёт ходимларидан бири вафот этган. Мутахассислар вазиятни ўрганмоқда ва тиббиёт ходимларидан бундай ҳолатлар тўғрисида тезкор хабар беришларини сўрамоқда.

«Университет шифохонаси қонида тромблар ҳосил бўлган уч нафар тиббиёт ходимининг орасида умумий жиҳатлар мавжудлигини текширмоқда. Шунингдек, улар ушбу ҳолатни чет элда аниқланган шундай ҳолатлар билан таққослайди», — деди Мадсен.

Мутахассислар вакцинанинг ножўя таъсирларини миллий ва Европа даражасида текширмоқда, — деди агентлик вакили.

Шунингдек, Хорватияда AstraZeneca вакцинаси билан эмлангандан кейин 91 ёшли аёл вафот этди. Таъкидланишича, бемор ўпка эмболияси туфайли вафот этган. Аввалроқ у AstraZeneca вакцинаси билан эмланган эди.

Эмланганларда тромблар пайдо бўлиши билан боғлиқ бир нечта ҳолатлар ҳақидаги маълумотлардан кейин Дания AstraZeneca вакцинасидан фойдаланишни икки ҳафтага тўхтатиб қўйди. Бундай ҳолатлардан бири ўлим билан тугаган.

Аввалроқ AstraZeneca компаниясининг вакили вакцинанинг юзага келиши мумкин бўлган ножўя таъсирлари сабабли Европанинг бир нечта мамлакатларида тақиқлангани ҳақида хабарларга муносабат билдирганди.