Ozarbayjon o‘z majburiyatlariga muvofiq barcha harbiy asirlarni Armanistonga topshirdi. Bu haqda 15-mart, dushanba kuni mamlakat tashqi ishlar vaziri Jayxun Bayramov Shvetsiya tashqi ishlar vaziri hamda Yevropa Xavfsizlik va hamkorlik tashkilotining amaldagi raisi Ann Linde bilan muzokaralar yakuni bo‘yicha o‘tkazilgan brifingda aytib o‘tdi, deb yozadi “TASS”.
“Mazkur masalada Ozarbayjon davlatining pozitsiyasi juda ochiq va ravshan. Biz 2020-yilning 9-noyabrida tuzilgan uch tomonlama bitimga muvofiq Qorabog‘dagi harbiy harakatlar paytida va ular boshlanishidan oldin olib ketilgan barcha harbiy asirlarni Armanistonga topshirdik”, — dedi Ozarbayjon vaziri.
Bayramovning ta’kidlashicha, Ozarbayjon harbiy asirlarni Armanistonga qaraganda ertaroq hattoki harbiy harakatlar paytida ham topshirishni boshlagan.
Hozirda Ozarbayjonda saqlanayotgan armanistonlik harbiy xizmatchilarga to‘xtalar ekan, tashqi ishlar vaziri ularning harbiy asirlar hisoblanmasligini ta’kidladi, chunki ular harbiy harakatlar paytida hibsga olinmagan.
“Bu odamlar jangovar harakatlar tugagandan va uch tomonlama bitim imzolanganidan so‘ng, aniqrog‘i, 2020 yil 26-noyabrda qo‘lga olingan. Ular Armanistonning Shirak viloyatida tayyorgarlikdan o‘tib, Qorabog‘ga ko‘chirilib, Ozarbayjon harbiylari va tinch aholining o‘limiga sabab bo‘lgan jinoyatlar sodir etgan. Ularga qarshi tergov harakatlari davom etmoqda”, — deya qo‘shimcha qildi vazir.
Eslatib o‘tamiz, Tog‘li Qorabog‘dagi nizo 2020-yil sentabrda kuchaydi. 2020-yil 10-noyabr kuni Rossiya, Ozarbayjon va Armaniston Tog‘li Qorabog‘da tinchlik haqida bitim imzoladi. Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi.
Avvalroq Ozarbayjon Tog‘li Qorabog‘da xalqaro aeroport qurishni boshlagani haqida xabar berilgandi.
Izoh (0)