So‘nggi o‘n yilliklar davomida Amerika prezidentlari mamlakat infratuzilmasini rivojlantirish uchun budjetdan zarur miqdordagi mablag‘ni ajrata olmagani sababli infratuzilma hozir xavfli va achinarli ahvolga tushgan. Bu haqda The Washington Post gazetasiga tayanib “TASS” xabar berdi.
Ma’lum qilinishicha, so‘nggi yillarda na respublikachilar, na demokratlar Oq uy va Kongressni boshqarish paytida, xususan, aeroportlar, keng polosali tarmoqlar, transport tizimlari, elektr uzatish liniyalari, portlar va kanalizatsiya kanallarini ta’mirlash va obodonlashtirish uchun zarur miqdorda mablag‘ sarflamagan.
Gazetaning ta’kidlashicha, mamlakatning ko‘plab shaharlarida “suv ta’minoti tizimi har ikki daqiqada buziladi, umumiy foydalaniladigan yo‘llarning yarmi esa achinarli yoki xarob holatda”. Mutaxassislarning fikriga ko‘ra, ijro hokimiyati bu vaqt davomida davlat infratuzilmasini rivojlantirish bo‘yicha hatto samarali rejaga ham ega bo‘lmagan.
The Washington Post gazetasining yozishicha, Qo‘shma Shtatlarda “ilm-fan, tibbiyot va texnologiyalar sohasidagi tarixiy yutuqlariga chambarchas va xavfli ravishda infratuzilma, sog‘liqni saqlash va aholining asosiy ehtiyojlaridan teng huquqli foydalanish masalalaridagi ulkan muvaffaqiyatsizliklar ham mavjud”.
Eslatib o‘tamiz, 2017-yilning mart oyida AQShning o‘sha paytdagi prezidenti Donald Tramp mamlakat infratuzilmasini qayta tiklash uchun Kongressdan 1 trln dollar so‘ragan edi.
Trampning ta’kidlashicha, AQSh ilgarilari xorijda harbiy harakatlar olib borishga ancha ko‘p mablag‘ sarflagan. Ularning barchasi milliy ahamiyatga ega obyektlarni qo‘llab-quvvatlashga sarflanishi mumkin edi. “Bu yerdagi infratuzilma vayron bo‘layotgan bir paytda Amerika Yaqin Sharqda taxminan 6 trillion dollarni xarj qildi”, — degan edi sobiq prezident.
Izoh (0)