Tesla rahbari Ilon Mask bosh direktor unvoniga kompaniyaning “texnoqiroli” unvonini qo‘shib qo‘ydi. Bu haqda Financial Times nashriga tayanib “RBK” xabar berdi.
Kompaniya rasman Ilon Mask Technoking of Tesla “unvoni”ni olgani haqida AQShning qimmatli qog‘ozlar bo‘yicha komissiyasiga (SEC) yuborilgan xabarnomada e’lon qildi.
Shuningdek, xabarnomada Tesla’ning moliyaviy direktori Zak Kirxorn Master of Coin qo‘shimcha “unvoni”ni olgani aytilgan. “Taxtlar o‘yini” serialida Master of Coin unvoni yetti qirollikning g‘aznasini yurituvchi Petir Beylish va Tirion Lannisterga beriladi.
Kirxornning yangi lavozimi nomini tanlash serial bilan bog‘liqmi yoki yo‘qmi, noma’lum. Mask o‘zining “toj kiydirish marosimi”ga ham hali izoh bermadi.
Ilon Mask hazilga bo‘lgan moyilligi bilan ham tanilgan, uning ba’zi hazillari hatto alohida “biznes-loyihalar”ga aylangan. Misol uchun, 2020-yilda Tesla’ning onlayn do‘konida qizil shortilar (Tesla short shorts) sotuvga qo‘yildi. Uning savdoga chiqarilishi Tesla aksiyalarining pasayishini kutib, qisqa pozitsiyalarni (short) ochgan aksiyadorlarning ustidan masxaraga aylandi.
2020-yilning noyabr oyida Tesla saytida o‘z brendi ostida tekila sota boshladi. Tesla Tequila chaqmoq shaklidagi shishasining 750 millilitri 250 dollarga sotildi. Avvalroq Mask “teslakila”ni 1-aprel xabarida Tesla’ning bankrotligi to‘g‘risidagi e’londa aytib o‘tgan edi.
2020-yilda Mask o‘g‘liga XÆA-12 deb ism qo‘ydi. Keyinchalik bolaning onasi ismni tanlashni Lockheed A-12 samolyotiga bo‘lgan mehri bilan izohladi.
Avvalroq Tesla elektromobil kompaniyasining investori kompaniyaning asoschisi va bosh direktori va direktorlar kengashi ustidan Delaver shtati sudiga shikoyat arizasi kiritdi. Investorning aytishicha, Mask o‘zining tvitlari orqali 2018-yilda AQShning qimmatli qog‘ozlar bo‘yicha komissiyasi (SEC) bilan tuzilgan shartnoma shartlarini buzmoqda. Unga ko‘ra, Mask birinchi navbatda ijtimoiy tarmoqlarda o‘z harakatlarini muvofiqlashtirishi kerak.
Izoh (0)